Sudhakar Badgujar : मी तो गुन्हा केलेला आहे; पक्षातून हकालपट्टी, बडगुजर यांची मोठी प्रतिक्रिया

पक्षात उघडपणे नाराजी व्यक्त करणं हा गुन्हा असेल तर मी तो गुन्हा केलेला आहे, अशी प्रतिक्रिया सुधाकर बडगुजर यांनी दिलेली आहे. पक्षविरोधी कारवाई केल्याचे कारण देत बडगुजर यांची ठाकरे गटातून हकालपट्टी केली आहे. त्यांनंतर त्यांनी ही प्रतिक्रिया दिली आहे. गुन्ह्याची शिक्षा पक्षातून हकालपट्टी करण्यात होतं असेल तर त्यावर मी काय बोलणार? असंही त्यांनी यावेळी म्हंटलं.

बडगुजर यांनी काल पक्षातील संघटनात्मक बदलात आपल्याला विचारात घेतलं नाही म्हणून नाराज असल्याची भावना व्यक्त केली होती. बडगुजर हे संजय राऊत यांचे राईट हँड समजले जायचे. गेल्याच आठवड्यात बडगुजर हे मुख्यमंत्री फडणवीस यांना देखील भेटले होते. त्यानंतरच त्यांनी ही नाराजी व्यक्त केली होती. आज नाशिकमध्ये ठाकरे गटाने पत्रकार परिषद आयोजित केली होती. त्यावेळी माजी जिल्हाप्रमुख दत्ता गायकवाड यांना संजय राऊत यांचा फोन आला. त्यानंतर पक्षविरोधी कारवाई केल्यानं बडगुजर यांची हकालपट्टी केल्याची घोषणा करण्यात आली.