सुधांशू त्रिवेदींचा राहुल गांधींना जोरदार पलटवार; काँग्रेसच्या पराभवांचा इतिहास सांगत उपस्थित केला सवाल!

भाजपने काँग्रेस पक्षावर अनुपस्थित, स्थलांतरित, मृत आणि डुप्लिकेट (ASDD) मतदारांना तपासणीशिवाय मतदानाचा हक्क देऊन लाभ पोहोचवण्याचा प्रयत्न करत असल्याचा गंभीर आरोप केला आहे. यामुळे लोकशाहीला धोका निर्माण होत असल्याचे भाजपने म्हटले आहे. पूर्वी शिधापत्रिका आणि मनरेगा योजनेत आढळून आलेल्या गैरव्यवहारांचा संदर्भ देत, भाजपने म्हटले की ५.८ कोटी शिधापत्रिका आणि ४.४५ कोटी मनरेगा लाभार्थी अस्तित्वातच नव्हते, तरीही त्यांना लाभ मिळत होता. याच धर्तीवर आता बोगस मतदारांद्वारे लोकशाही खाण्याचा प्रयत्न केला जात आहे. काँग्रेसच्या ऐतिहासिक राजकीय घसरणीवरही भाजपचे प्रवक्ते सुधांशू त्रिवेदी यांनी प्रकाश टाकला.

१९६७ पासून तामिळनाडू, १९७७ पासून पश्चिम बंगाल, १९९० पासून उत्तर प्रदेश-बिहार, १९९५ पासून गुजरात आणि १९९९ पासून ओडिशा या राज्यांमध्ये काँग्रेसने मोठ्या प्रमाणात जागा गमावल्याचे भाजपने म्हटले आहे. राहुल गांधींच्या राजकारणातील पदार्पणापूर्वीच काँग्रेस २२८ लोकसभा जागा असलेल्या राज्यांमध्ये सत्तेतून बाहेर गेली होती आणि आता त्यांना १० जागा मिळवणेही अवघड झाल्याचे भाजपने निदर्शनास आणले. राहुल गांधींच्या विधानसभा निवडणुकांमधील प्रचार सहभागावरही भाजपने प्रश्नचिन्ह उपस्थित केले. अमित शाह यांनी पश्चिम बंगालमध्ये २५ दिवस मुक्काम करून प्रचार केल्याचे उदाहरण देत, राहुल गांधींनी कोणत्या विधानसभा निवडणुकीत सातत्याने एक ते दोन आठवडे प्रचार केला आहे, असा सवाल भाजपने केला. काँग्रेस नेते कामचुकार असून, तेच मतांची चोरी केल्याचा आरोप करत असल्याचे भाजपने म्हटले आहे.