मुख्यमंत्री भाजपशिवाय दुसऱ्या पक्षाचा शक्य नाही! मुनगंटीवार यांचं मोठं वक्तव्य

नागपूर अधिवेशनाच्या पार्श्वभूमीवर आमदार सुधीर मुनगंटीवार यांनी विविध राजकीय घडामोडींवर आपले मत व्यक्त केले. आदर्श लोकशाहीत संवाद, चर्चा आणि मंथन महत्त्वाचे असल्याचे ते म्हणाले. बहिष्कार टाकण्यापेक्षा विधायक चर्चा व्हायला पाहिजे, असे त्यांनी सांगितले.

शालेय शिक्षण विभागातील कथित घोटाळ्याच्या आरोपांवर बोलताना, या संदर्भात मुख्यमंत्री योग्य उत्तर देतील असे मुनगंटीवार यांनी सांगितले. प्रकाश आंबेडकर यांच्या एकनाथ शिंदे पुन्हा मुख्यमंत्री होणार या वक्तव्यावर त्यांनी ठामपणे सांगितले की, भारतीय जनता पार्टीकडे 132 आमदार आणि पाठिंबा देणारे पाच, असे एकूण 137 आमदार आहेत. त्यामुळे मुख्यमंत्री भाजपचाच असेल आणि दुसऱ्या पक्षाचा मुख्यमंत्री होण्याची शक्यता नाही.

देशातील राजकारणात 19 डिसेंबरनंतर मोठ्या घडामोडी घडतील आणि इस्रायली स्टिंग ऑपरेशनमुळे राज्यात व देशात बदल होतील या आरोपांवर मुनगंटीवार यांनी तीव्र नाराजी व्यक्त केली. “आमचा देश स्वतंत्र आणि सार्वभौम आहे. तो दुसऱ्या देशांच्या स्टिंग ऑपरेशनवर चालत नाही,” असे ते म्हणाले. विदेशाच्या षडयंत्रात भारतातील काही पक्षांचा सहभाग आहे का, असा सवाल त्यांनी उपस्थित केला. अजून षडयंत्राची सुरुवातही झाली नसताना, घडामोडींची माहिती कशी मिळते यावर त्यांनी संशय व्यक्त केला.