नाना पाटेकरांच्या निधनाने सुनेत्रा पवार भावुक; म्हणाल्या, ‘सिनेसृष्टीतल ही पोकळी भरून निघणार नाही’

ज्येष्ठ अभिनेते नाना पाटेकर यांच्या निधनाचे वृत्त मनाला अक्षरशः चटका लावणारे आहे, अशा शब्दांत उपमुख्यमंत्री सुनेत्रा पवार यांनी आपल्या भावना व्यक्त करत त्यांना श्रद्धांजली वाहिली आहे. त्यांनी X (माजी ट्विटर) पोस्ट करत नाना पाटेकर यांच्या निधनाची बातमी दुःखद असल्याचे म्हटले आहे. पवार यांनी नमूद केले की, अभिनयाचा अस्सल आविष्कार आणि संवेदनशील सामाजिक जाणिवांचा सुंदर संगम नाना पाटेकर यांच्या व्यक्तिमत्त्वात होता. त्यांनी रंगभूमीपासून ते रुपेरी पडद्यापर्यंत आपल्या दमदार अभिनयाने असंख्य व्यक्तिरेखा अजरामर केल्या.

नटसम्राट, क्रांतिवीर आणि परिंदा यांसारख्या गाजलेल्या कलाकृतींमधून त्यांनी आपल्या अभिनयाची अमीत छाप प्रेक्षकांच्या मनावर उमटवली. नाना पाटेकर यांचे दादांशी अतिशय जिव्हाळ्याचे आणि आपुलकीचे संबंध होते, असेही सुनेत्रा पवार यांनी सांगितले. त्यांच्या निधनाने झालेली पोकळी माझ्यासाठी आणि आमच्या कुटुंबासाठीही विशेष दुःखद आहे, असे त्यांनी म्हटले. कलेसोबतच सामाजिक बांधिलकी जपत नाना पाटेकर यांनी समाजातील वंचित घटक आणि शेतकरी बांधवांसाठी केलेले कार्य सदैव प्रेरणादायी राहील, असे गौरवोद्गार सुनेत्रा पवार यांनी काढले. नाना पाटेकर यांच्या निधनाने एक महान कलावंत आणि समाजसेवक हरपल्याची भावना व्यक्त होत आहे.