ठाकरे बंधूंचा ज्ञानेश कुमारांविरोधात एल्गार, मतदार यादीच्या मुद्द्यावर मुंबईत मोठं आंदोलन

आज मुंबईत ठाकरे बंधूंनी ज्ञानेश कुमारांविरोधात गर्जना मोर्चा काढला. मतदार यादीतील कथित घोळाच्या संदर्भात सत्याचा एल्गार पुकारण्यासाठी हा मोर्चा आयोजित करण्यात आला होता. मेट्रो सिनेमा येथून सकाळी १० वाजता सुरू झालेला हा मोर्चा मुंबई महानगरपालिकेच्या मुख्यालयापर्यंत धडकला. या मोर्च्याला राष्ट्रवादी काँग्रेस (शरदचंद्र पवार पक्ष) आणि काँग्रेस या महाविकास आघाडीतील घटक पक्षांनी सक्रिय पाठिंबा दिला.

राष्ट्रवादी काँग्रेसचे प्रदेशाध्यक्ष शशिकांत शिंदे आणि जयंत पाटील यांच्यासह मुंबईतील काँग्रेसचे प्रमुख नेते मोर्च्यात सहभागी झाले. मोर्चाच्या पार्श्वभूमीवर, पोलिसांनी सीएसएमटी परिसरातील वाहतुकीत बदल करत खबरदारी म्हणून बॅरिकेटिंग लावली होती आणि काही रस्ते वाहतुकीसाठी बंद केले होते. मोठ्या संख्येने कार्यकर्ते या मोर्चात सहभागी झाले होते, ज्यामुळे पोलिसांना कडक बंदोबस्त ठेवावा लागला. महापालिकेसमोर आयोजित जाहीर सभेत ठाकरे बंधू यापुढील त्यांची भूमिका आणि रणनीती स्पष्ट करणार आहेत. मतदार यादीतील गैरव्यवहारावर लक्ष वेधण्यासाठी हा मोर्चा महत्त्वाचा मानला जात आहे.