BMC Election 2026 : शब्द ठाकरेंचा! ठाकरे बंधूंचा ‘शिवशक्ती’ वचननामा जाहीर; राज ठाकरे 20 वर्षांनी शिवसेना भवनात

मुंबई महापालिका निवडणुकीच्या पार्श्वभूमीवर, उद्धव ठाकरे आणि राज ठाकरे यांनी संयुक्त पत्रकार परिषद घेऊन आपला वचननामा जाहीर केला. मुंबईकरांसाठी शिवशक्तीचा वचननामा असे नाव दिलेल्या या जाहीरनाम्यात बेस्टच्या घरगुती ग्राहकांना १०० युनिटपर्यंत मोफत वीज, ७०० चौरस फुटांपर्यंतच्या घरांना मालमत्ता कर माफी, पालिका कर्मचाऱ्यांपासून मिल कामगारांपर्यंत सर्वांना हक्काची घरे, तसेच महिला आणि विद्यार्थ्यांसाठी बेस्टचा मोफत प्रवास अशा प्रमुख घोषणांचा समावेश आहे.

विशेष म्हणजे, या वचननाम्याच्या प्रकाशनासाठी राज ठाकरे तब्बल २० वर्षांनी शिवसेना भवनात उपस्थित राहिले. या वचननाम्यावर भाजपने तीव्र टीका केली आहे. भाजप नेत्यांनी ठाकरे बंधूंवर केवळ कागदावर घोषणा करण्याचा आरोप केला, तर ठाकरे बंधूंनी मुंबई महापालिकेच्या ठेवी, कोस्टल रोडचे श्रेय, आणि कोविड काळातील कामांवरून भाजपला प्रत्युत्तर दिले. पुढील आठवड्यात दोन्ही ठाकरे बंधूंची एकत्रित सभा होणार असून, त्यापूर्वीच भाजप आणि ठाकरे गटांमधील आरोप-प्रत्यारोपांना वेग आला आहे.