Mahayuti : महायुतीतच भाजप अन् शिंदे सेनेत खटके, ठाण्यात एकला चलो रे… महापौरपदावरून संघर्ष

ठाणे महापालिका निवडणुकीच्या पार्श्वभूमीवर महायुतीतील घटक पक्ष असलेल्या भाजप आणि एकनाथ शिंदे यांच्या नेतृत्वाखालील शिवसेनेत तीव्र मतभेद समोर आले आहेत. दोन्ही पक्ष स्वतंत्रपणे निवडणूक लढवण्याची भाषा करत असल्याने स्थानिक पातळीवर युतीत संघर्ष निर्माण झाला आहे. शिंदे गटाच्या पदाधिकाऱ्यांच्या बैठकीत एकला चलो रेचा नारा देण्यात आला. त्यानंतर भाजपनेही स्वबळावर निवडणूक लढवण्याचे संकेत देत अबकी बार 70 पार आणि ठाण्यात भाजपचाच महापौर होईल असा निर्धार व्यक्त केला.

भाजप आमदार संजय केळकर यांच्या महापौरपदावरील वक्तव्यावरून तसेच मंत्री गणेश नाईक यांच्या जनता दरबारावरून शिंदे गटात नाराजी असल्याचे समोर आले आहे. शिंदे गटाचे खासदार नरेश म्हस्के यांनी महायुती झाली तर ठीक, अन्यथा वेगळे लढणार असल्याचे म्हटले आहे, तर भाजपनेही गाफील न राहण्याचे संकेत दिले आहेत.