धक्कादायक! आठवड्याभरातच मुंबई लोकलमध्ये तिसरा चाकू हल्ला; माहिममध्ये…

मुंबईत पुन्हा एकदा लोकल परिसरातील सुरक्षेचा प्रश्न ऐरणीवर आला आहे. पश्चिम रेल्वेतील मयंक लोहार हत्या प्रकरणाची चर्चा अद्याप सुरू असतानाच माहिम परिसरात चाकू हल्ल्याची धक्कादायक घटना घडली आहे. रात्री सुमारे 10 वाजण्याच्या सुमारास माहिम रेल्वे स्थानकाजवळ हा प्रकार घडल्याची माहिती समोर आली आहे.

लोअर परळ येथील खासगी कंपनीत ऑफिस बॉय म्हणून काम करणारे नवीन प्रसाद हे कामावरून घरी परतत होते. यावेळी स्टेशन परिसरात एका अनोळखी व्यक्तीला चुकून धक्का लागला. धक्क्यानंतर त्या व्यक्तीचा मोबाईल खाली पडला. मात्र मोबाईल सुरक्षित असल्याचे दिसूनही आरोपीने नवीन प्रसाद यांच्याशी वाद घालण्यास सुरुवात केली.

वाद वाढत असल्याचे पाहून नवीन तेथून निघून गेले. मात्र आरोपीने त्यांचा पाठलाग करत सेनापती बापट मार्गावर त्यांच्यावर चाकूने हल्ला केला. या घटनेनंतर परिसरात भीतीचे वातावरण निर्माण झाले आहे. काही दिवसांपूर्वी CSMT स्थानकावरही एका व्यक्तीने कोयता उगारल्याची घटना घडली होती. त्यामुळे मुंबई लोकल आणि स्टेशन परिसरातील सुरक्षेबाबत पुन्हा प्रश्न उपस्थित होत आहेत.