शैलेश पुरोहित, इगतपुरीः मुंबई-आग्रा महामार्गांवर (Mumbai-Agra highway) आसनगावजवळ झालेल्या ट्रक (Truck) आणि मालवाहतूक ट्रेलर पलटी होऊन झालेल्या दोन वेगवेगळ्या अपघातांमुळे पहाटे तीनपासून वाहतूक विस्कळीत झाली आहे. यात कसलिही जीवित हानी झाली नाही. या अपघाताविषयी अधिक माहिती अशी की, हॉटेल परिवारच्या समोर पहाटे 3 वाजता मालवाहतूक करणारा ट्रक हा रस्त्याच्या कडेला असलेल्या विजेच्या खांबावर जाऊन धडकला. त्यानंतर तो महामार्गावर येऊन पलटला. त्यामुळे मुंबईकडे जाणारी वाहतूक पूर्णपणे बंद झाली. तसेच चेरपोली गावाजवळ एक मालवाहतूक ट्रेलर (trailer) पलटी झाला. या दोन्ही अपघातात जीवित हानी झाली नाही, परंतु मुंबईकडे जाणारी वाहतूक पहाटेपासून ठप्प आहे. त्याचा वाहन चालकांना तसेच प्रवाशांना मोठा मनस्ताप सहन करावा लागत आहे. हे पोल काढण्याचे काम युद्ध पातळीवर सुरू आहे.