Thackeray Brothers : ठाकरे बंधूंच्या एकजुटीने मोर्चाला बळ, उद्धव ठाकरेंचे मुंबईकरांना एकच आवाहन थेट युतीची घोषणाच केली!

मतदार याद्यांमधील कथित त्रुटी दुरुस्त करण्याच्या मागणीसाठी मुंबईत महाविकास आघाडी आणि महाराष्ट्र नवनिर्माण सेनेचा (मनसे) मोर्चा निघाला. या मोर्चाचे मुख्य आकर्षण उद्धव ठाकरे आणि राज ठाकरे हे ठाकरे बंधू होते. उद्धव ठाकरेंनी मुंबईकरांना उद्देशून “आम्ही तुमच्यासाठी, मराठी माणसासाठी, हिंदूंसाठी आणि महाराष्ट्रासाठी एकत्र आलो आहोत, आता साथ द्या,” असे भावनिक आवाहन केले. त्यांनी जनतेला हात वर करून आपला पाठिंबा दाखवण्याचे आवाहन केले आणि मतचोरी करणाऱ्यांना तीव्र शब्दात इशारा दिला.

या मोर्चात सहभागी होण्यासाठी राज ठाकरे लोकलने चर्चगेटला आले, तर उद्धव ठाकरे त्यांना हॉटेलमध्ये भेटायला गेले. दोघांनीही एकत्रितपणे मोर्चात सहभाग घेतला आणि मंचावरही शेजारी बसून एकजुटीचा संदेश दिला. या एकजुटीमुळे मुंबईतील त्यांच्या राजकीय ताकदीत वाढ होण्याची शक्यता वर्तवली जात आहे. मात्र, काँग्रेसचे काही प्रमुख नेते या मोर्चात अनुपस्थित राहिल्याने राजकीय वर्तुळात वेगळ्या चर्चांना उधाण आले आहे.