Chandrakant Patil : खरा पक्ष कुणाचा? चंद्रकांतदादा जे बोलले त्यानं शिंदे, अजित पवार गट अस्वस्थ अन् राजकारणात खळबळ

भाजपचे मंत्री चंद्रकांत पाटील यांच्या एका विधानामुळे महाराष्ट्राच्या राजकारणात नव्या वादाला तोंड फुटले आहे. पाटलांनी महाराष्ट्रातील पक्षांचा उल्लेख करताना राष्ट्रवादी काँग्रेस हा शरद पवारांचा आणि शिवसेना हा उद्धव ठाकरेंचा पक्ष असल्याचे म्हटले. या वक्तव्यामुळे सत्ताधारी महायुतीमधील एकनाथ शिंदे यांच्या नेतृत्वाखालील शिवसेना आणि अजित पवार यांच्या नेतृत्वाखालील राष्ट्रवादी काँग्रेस पक्षातील कार्यकर्ते व नेत्यांमध्ये नाराजी पसरली आहे. शिंदे गट आणि अजित पवार गट स्वतःलाच मूळ पक्ष मानत असताना, भाजपच्याच एका मंत्र्याने अप्रत्यक्षपणे विरोधी गटांच्या नेतृत्वाला मान्यता दिल्याने त्यांच्या भूमिकेची कोंडी झाली आहे.

यापूर्वीही चंद्रकांत पाटील यांनी लोकसभेवेळी अजित पवारांऐवजी शरद पवारांचा पराभव वजनदार असल्याचे विधान करून वाद ओढवून घेतला होता. त्यामुळे पाटील यांच्या या ताज्या विधानामुळे दोन्ही गटांचे समर्थक संभ्रमात पडले असून, खरी शिवसेना आणि राष्ट्रवादी काँग्रेस कुणाची, हा प्रश्न पुन्हा एकदा ऐरणीवर आला आहे.