‘घबराए नही, हम मराठी सिखाएंगे’, राज ठाकरेंच्या ‘खळखट्याक’ इशाऱ्यानंतर ठाकरे गटाकडून बॅनरबाजी अन् मनसेला उत्तर

मराठी भाषेच्या मुद्द्यावरून राज ठाकरेंनी पुन्हा एकदा आग्रही भूमिका घेतली असून मनसैनिक गेल्या चार-पाच दिवसांपासून बँका, सार्वजनिक अस्थापनांना भेट घेऊन मराठी भाषेचा आवर्जून उल्लेख करा, या आशयाचं एक निवदेन देत आहेत. यासह त्यांना १५ दिवसांचा अल्टिमेटम देखील मनसैनिकांनी यावेळी दिला. दरम्यान, मराठी भाषेसाठी आता मुंबईत उद्धव ठाकरे यांच्या शिवसेनेकडूव जोरदार बॅनरबाजी करण्यात आल्याचे पाहायला मिळत आहे. या बॅनरवर मराठी बोलूया, मराठीचा सन्मान राखूया असा उल्लेख करण्यात आला आहे. ज्यांना मराठी बोलायला, वाचायला आणि लिहायला येत नाही, अशा लोकांना ठाकरेंच्या शिवसेनेकडून खास शिकवणी असल्याचे या बॅनरवर नमूद केलं आहे. ‘घाबरू नका, चला मराठी बोलूया… चला करूया मराठी भाषेचा सन्मान.. घबराए नही हम सिखाएंगे आपकोमराठी भाषा… आईए मिलकर सिखेंगे मराठी भाषा’, असं या बॅनरवर म्हटलं आहे. शिवसेना ठाकरे गटाचे प्रवक्ते आनंद दुबे यांच्याकडून हे बॅनर लावण्यात आले आहेत.