Breaking | यूपीए नेतृत्वासंदर्भात ममता बॅनर्जी यांची समजूत काढण्याची जबाबदारी शरद पवारांकडे – सूत्र

भाजपविरोधात यूपीए आता अधिक आक्रमक होताना पाहायला मिळत आहे. पाच राज्यांच्या निवडणुकीच्या पार्श्वभूमीवर काँग्रेसनं भाजपविरोधात जोरदार मोहीम उघडली आहे. तर दुसरीकडे आज राजधानी दिल्लीत काँग्रेसच्या हंगामी अध्यक्षा सोनिया गांधी यांच्या 10 जनपथवरील निवासस्थानी महत्वाची बैठक पार पडली. या बैठकीत राजकीय स्थितीबाबत चर्चा झाल्याची माहिती मिळतेय. त्याचबरोबर पश्चिम बंगालच्या मुख्यमंत्री आणि तृणमूल काँग्रेसच्या सर्वेसर्वा ममता बॅनर्जी यांची समजूत काढण्याबाबतही चर्चा झाल्याची सूत्रांची माहिती आहे. महत्वाची बाब म्हणजे ममता बॅनर्जी यांची समजूत काढण्याची जबाबदारी ही राष्ट्रवादी काँग्रेसचे अध्यक्ष शरद पवार यांच्याकडे देण्यात आल्याची माहिती मिळत आहे.

दिल्लीत आज झालेल्या विरोधकांच्या बैठकीला सोनिया गांधी, शरद पवार, सीताराम येचुरी, फारुक अब्दुल्ला, डीएमकेचे टी आर बालू, शिवसेनेकडून संजय राऊत आदी उपस्थित होते. यावेळी काँग्रेसला वगळून विरोधकांची मोट बांधण्याचा प्रयत्न करणाऱ्या ममता बॅनर्जी यांची समजूत काढण्याबाबत चर्चा झाली. ही जबाबदारी शरद पवार यांच्या खांद्यावर देण्यात आल्याची माहिती मिळत आहे. काँग्रेसशिवाय विरोधी पक्षांच्या ऐक्याला या बैठकीतीली नेत्यांनी सहमती दर्शवली नसल्याचं कळतंय. त्याचबरोबर भाजप विरोधात लढण्यासाठी राज्यनिहाय व्यूहरचना आखण्याबाबतही या नेत्यांमध्ये सहमती झाल्याचं कळतं.