Goat Dairy: एकच शेळी दूर करेल गरिबी! सर्वाधिक दूध देणारी ही बकरी ठरेल फायदेशीर

Saanen Goat Milk : दुग्धोत्पदानात गाय, म्हशीसोबतच शेळीचेही महत्त्व आहे. बकरीचे दूध अनेक आजारांवर गुणकारी मानले जाते. ताप आला, ऊन लागलं तर शेळीचे दूध रामबाण उपाय ठरते. आता तर सौंदर्यप्रसाधनांमध्ये शेळीच्या दुधाला मोठे महत्त्व आले आहे. शेतीसोबत अनेक शेतकरी जोडधंदा करतात. शेळीपालनाचा विचार करत असला तर शेळीची ही परदेशी जात तुम्हाला मालामाल करेल. ही बकरी जगातील सर्वाधिक दूध देणारी मानली जाते. स्वित्झर्लंडची सानन ही शेळी जगभरात प्रसिद्ध आहे.

बाजारात या बकरीची मोठी मागणी

बाजारात देशी बकऱ्या कमी दूध देतात. कधी कधी तर एक सिंगल कप दूध निघते. पण सानन जातीच्या बकऱ्यांची दूध देण्याची क्षमता सर्वाधिक आहे. त्यामुळे या जातीच्या बकरीला सर्वाधिक मागणी आहे. दूध व्यवसायासाठी आणि बचत गटासाठी ही बकरी महत्त्वाची मानली जाते. जगभरात बकरीच्या अनेक जाती आहेत. पण सर्वाधिक दूध देणारी जात म्हणून सानन ओळखली जाते.

सानन जातीची बकरी किती लिटर देते दूध?

ही परदेशी जात, दूध देण्यात सर्वात पुढे आहे. ती रेकॉर्डतोड दूध देते. त्यामुळे इतर बकऱ्यांपेक्षा ती अत्यंत विशेष मानली जाते. जर तिची देखभाल, निगा राखली, चांगले संगोपन केले आणि चरण्याची सोय असली तर ही बकरी रोज जवळपास 3 ते 5 लिटर दूध सहज देते. वर्षभराचा हिशोब तर जवळपास 800 ते 1000 लिटर दूध देण्याच्या घरात जातो. या बकरीच्या दूध गुणवत्तापूर्ण आणि दर्जेदार मानले जाते. हे दूध घट्ट आणि पौष्टिक मानले जाते. या दुधापासून पनीर, तूप आणि खवा तयार होतो. त्याच्या चवीमुळे विक्रीही अधिक होते.

सानन बकरीची किंमत तरी किती?

भारतीय बाजारात सानन बकरीची किंमत तिचे वय, आरोग्य आणि दूध देण्याची क्षमता यावर अवलंबून असते. ही बकरी खरेदी करण्यासाठी 25000 रुपये ते 40000 रुपये मोजावे लागू शकतात. तर चांगल्या दर्जाचा बकरा खरेदीसाठी 20000 ते 35000 रुपये खर्च करावा लागतो. जर तुम्ही नोंदणीकृत उच्च दर्जाची सानन बकरी खरेदी करणार असाल तर त्यासाठी 50000 ते 60000 रुपयांपर्यंत खर्च येतो. या बकरीच्या दूधाला बाजारात मोठा भाव आहे. सानन बकरीचे दूध बाजारात 150 ते 200 रुपये लिटरप्रमाणे विक्री होते. सौंदर्यप्रसाधनांमध्ये या बकरीच्या दुधाला चांगली मागणी असते.