China Gold Policy : दूर की सोच, संकट काळात चीन सोन्याच्या बाबतीत अशा स्ट्रॅटजीने चाललाय सगळं जग हैराण

पंतप्रधान नरेंद्र मोदी यांनी देशवासियांना वर्षभर सोनं खरेदी करु नका असं आवाहन केलं आहे. सोनं खरेदीसाठी मोठ्या प्रमाणात डॉलर खर्च करावा लागतो. परिणामी परकीय चलन साठ्यात घट होत चालली आहे. त्यामुळे मोदी सोनं खरेदी करु नका असं सांगत आहेत. पण चीनची स्ट्रॅटजी बिलुकल या उलट आहे. चीन जगभरातील गोल्ड मार्केटमध्ये एक मोठी शक्ती म्हणून समोर येत आहे. चीनची केंद्रीय बँक सतत मोठ्या प्रमाणावर सोनं खरेदी करत आहे. एप्रिल 2026 पर्यंत सलग 18 व्या महिन्यातही हा सिलसिला कायम होता. चीनच्या या आक्रमक सोनं खरेदीमुळे ग्लोबल मार्केट आणि डॉलर आधारित वित्तीय व्यवस्थेवर प्रश्न चिन्ह निर्माण झालं आहे. पीपुल्स बँक ऑफ चायना म्हणजे चीनच्या केंद्रीय बँकेने एप्रिल 2026 मध्ये 8 टन सोनं खरेदी केलं. या सोबतच चीनचा अधिकृत गोल्ड रिझर्व वाढून 7 कोटी 28 लाख ट्रॉय औंस पर्यंत पोहोचला आहे. मार्च अखेरपर्यंत या रिझर्व्हची एकूण किंमत जवळपास 342.76 अब्ज डॉलर आहे.

एक्सपर्ट्सच म्हणणं आहे की, चीनची ही खरेदी फक्त सामान्य गुंतवणूक नाही. यामागे एक दीर्घकालिन आर्थिक आणि रणनितीक विचार आहे. चीनला अमेरिकी डॉलरवरील आपलं अवलंबित्व कमी करायचं आहे. चीनच्या परकीय चलन साठ्याचा मोठा हिस्सा आता सोन्यामध्ये परावर्तित होतोय. अलीकडच्या वर्षातील अमेरिकेसोबतच्या संबंधातील तणाव, प्रतिबंध आणि जागतिक अस्थितरता या पार्श्वभूमीवर चीनने ही नवीन रणनिती स्वीकारली आहे. चीनच्या मते सोनं संपत्ती आहे. कुठलाही देश सोनं फ्रिज करु शकत नाही. भविष्यात आर्थिक प्रतिबंध किंवा जागतिक संकटाची स्थिती गंभीर झाली, तर सोनं त्यांच्यासाठी सुरक्षा कवच म्हणून काम करेल.

लॉन्ग टर्म रणनीतिवर चीनचं काम

त्याशिवाय अजून एक कारण म्हणजे चीनला आपली मुद्रा युआनला अजून मजबूत बनवायचं आहे. आंतरराष्ट्रीय व्यापारात डॉलरच्या जागी युआनचा वापर वाढावा अशी चीनची महत्वकांक्षा आहे. अशावेळी मजबूत गोल्ड रिझर्वमुळे त्यांची आर्थिक प्रतिष्ठा अजून वाढेल. इंटरेस्टिंग गोष्ट म्हणजे सोन्याच्या किंमतींमध्ये मोठ्या प्रमाणात चढ-उतार सुरु आहेत. तरीही चीनकडून सातत्याने खरेदी सुरु आहे. बीजिंग शॉर्ट टर्म फायद्याचा विचार करत नाहीय. लॉन्ग टर्म रणनीतिवर त्यांचं काम सुरु आहे. चीन स्वत:साठी एक मजबूत आणि सुरक्षित रिझर्व तयार करण्याच्या मिशनवर आहे. पण वाढत्या मागणीचा ग्लोबल मार्केटवर स्पष्ट परिणाम दिसून येतोय. चीन सोबत सामान्य गुंतवणूकदार देखील मोठ्या प्रमाणात खरेदी करतायत.