एकेकाळी 5000 कोटींचे साम्राज्य, आता दिवाळखोर घोषित; Videoconचे वेणूगोपाळ धूत यांना मोठा झटका!
धूत यांची वैयक्तिक दिवाळखोरी निराकरण प्रक्रिया अयशस्वी झाल्यानंतर हा आदेश आला आहे, कारण कर्जदारांनी पहिल्या 36 महिन्यांत ₹600 कोटी देऊन आपली थकबाकी फेडण्याचा त्यांचा प्रस्ताव नाकारला होता.
Venugopal Dhoot: राष्ट्रीय कंपनी कायदा न्यायाधिकरणाने (NCLT) व्हिडिओकॉन इंडस्ट्रीजचे माजी प्रवर्तक आणि संचालक वेणुगोपाल नंदलाल धूत यांना दिवाळखोर घोषित केले आहे. त्यांच्यावर स्टेट बँक ऑफ इंडिया (SBI) आणि तिच्या सहयोगी बँकांचे एकूण ₹12,668.06 कोटींचे कर्ज आहे. हे कर्ज फेडण्यास असमर्थ असल्यामुळे NCLT ने त्यांना दिवाळखोर घोषित केले.
Videoconचे वेणूगोपाळ धूत दिवाळखोर!
समोर आलेल्या माहितीनुसार, NCLT च्या मुंबई खंडपीठाने दिवाळखोरी आणि नादारी संहितेच्या (IBC) कलम 121 अंतर्गत दाखल केलेला SBI चा दिवाळखोरी अर्ज स्वीकारला. धूत यांची वैयक्तिक दिवाळखोरी निराकरण प्रक्रिया अयशस्वी झाल्यानंतर हा आदेश आला आहे, कारण कर्जदारांनी पहिल्या 36 महिन्यांत ₹600 कोटी देऊन आपली थकबाकी फेडण्याचा त्यांचा प्रस्ताव नाकारला होता.
न्यायाधिकरणाने धूत यांच्या वैयक्तिक मालमत्तेचे व्यवस्थापन आणि वितरण करण्यासाठी दिवाळखोरी व्यावसायिक आशिष नारायण यांची दिवाळखोरी विश्वस्त म्हणून नियुक्ती केली आहे. एनसीएलटीच्या निर्देशांनुसार, धूत यांची संपूर्ण मालमत्ता आता एका विश्वस्ताच्या ताब्यात आहे, ज्याला कर्जदारांकडून दावे मागवण्यासाठी सार्वजनिक सूचना जारी करण्याचे आणि ९० दिवसांच्या आत न्यायाधिकरणाला प्राथमिक अहवाल सादर करण्याचे आदेश देण्यात आले आहेत.
धूत यांच्यावर किती कर्ज आहे?
धूत यांनी व्हिडिओकॉन इंडस्ट्रीज लिमिटेड (व्हीआयएल) आणि व्हिडिओकॉन टेलिकम्युनिकेशन्स लिमिटेड (व्हीटीएल) यांना दिलेल्या पतसुविधांसाठी वैयक्तिक हमी दिली होती. एसबीआयच्या दाखल केलेल्या माहितीनुसार, 30 सप्टेंबर 2026 पर्यंत एकूण थकबाकी 12,668 कोटी आहे. या एकूण रकमेमध्ये रुपया टर्म लोन सुविधेअंतर्गत 9322.10 कोटी, व्हीटीएल सुविधेअंतर्गत1,437.76 कोटी आणि खेळते भांडवल सुविधेअंतर्गत1,908.19 कोटी यांचा समावेश आहे.
दरम्यान, व्हिडिओकॉन ग्रुपच्या कंपन्या आर्थिक अडचणीत आल्यानंतर सुरुवातीला कर्ज खात्यांची परतफेड थांबली होती, ज्यामुळे जून 2018 मध्ये व्हिडिओकॉन इंडस्ट्रीजविरुद्ध कॉर्पोरेट दिवाळखोरी निवारण प्रक्रिया सुरू करण्यात आली. त्यानंतर एसबीआयने धूत यांची वैयक्तिक हमी लागू केली आणि थकबाकी वसूल करण्यासाठी एनसीएलटीकडे धाव घेतली. न्यायालयाने धूत यांना सात दिवसांच्या आत दिवाळखोरी विश्वस्तांना त्यांच्या आर्थिक स्थितीचा संपूर्ण तपशील देण्याचे निर्देश दिले आहेत.
