Indian Railways : ट्रेनमधून सामान नेण्याबाबतचे नियम बदलले, आता या वस्तूंना मिळाली मंजूरी
Railway Luggage Rules : रेल्वेत प्रवास करताना अनेक पदार्थ सोबत नेण्यावर रेल्वेने बंदी घातलेली आहे. मात्र आता काही प्रकारच्या वस्तूंना रेल्वेत सोबत नेण्यास परवानगी देण्यात आली आहे.
भारतात दररोज लाखो प्रवासी ट्रेनने प्रवास करतात. हा प्रवास करताना प्रवाशांनी रेल्वेच्या नियमांचे पालन करणे आवश्यक असते. कारण रेल्वेत प्रवास करताना अनेक पदार्थ सोबत नेण्यावर रेल्वेने बंदी घातलेली आहे. याबाबतच्या नियमांचे उल्लंघन करणाऱ्या प्रवाशांवर कारवाई केली जाऊ शकते तसेच दंडही आकारला जाऊ शकतो. मात्र आता रेल्वेने प्रवास करणाऱ्या खेळाडूंसाठी एक दिलासादायक बातमी आहे. आता मोठ्या आकाराचे क्रीडा साहित्य रेल्वेत घेऊन जाण्यास परवानगी देण्यात आली आहे. याबाबत सविस्तर माहिती जाणून घेऊयात.
रेल्वेने प्रवास करणाऱ्या खेळाडूंसाठी आनंदाची बातमी आहे. केंद्रीय रेल्वे मंत्रालयाने नवीन मार्गदर्शक तत्त्वे जारी करत मोठ्या आकाराच्या क्रीडा साहित्याला रेल्वेत नेण्यास परवानगी दिली आहे. मात्र, ही सुविधा सर्व प्रकारच्या क्रीडा साहित्याला लागू होणार नाही. रेल्वे मंत्रालयाच्या परिपत्रकात मोठ्या आकाराचे आणि नाजूक क्रीडा साहित्य वाहून नेण्याबाबतचे नियम स्पष्ट करण्यात आले आहेत.
कोणते क्रीडा साहित्य सोबत नेता येणार?
नवीन नियमांनुसार, भालाफेकीसाठी वापरला जाणारा भाला आणि इतर मोठ्या आकाराचे क्रीडा साहित्य मालवाहतूक शुल्क भरल्यानंतर रेल्वेत नेता येणार आहे. अशा क्रीडा साहित्याला ट्रेनच्या लगेज डब्यात प्राधान्याने जागा दिली जाणार आहे. जेणेकरून खेळाडूंना प्रवासादरम्यान कोणतीही अडचण येणार नाही. तसेच, या क्रीडा साहित्यावर सामान्य सामानासाठी लागू असलेली वजन मर्यादा लागू होणार नसल्याचे रेल्वे मंत्रालयाने स्पष्ट केले आहे. त्यामुळे आता खेळाडूंना या निर्णयाचा फायदा होणार आहे.
या क्रीडा साहित्याला परवानगी नाही
नवीन नियमांमध्ये पोल व्हॉल्टसाठी वापरला जाणारा पोल समाविष्ट करण्यात आलेला नाही. त्याची लांबी आणि तांत्रिक कारणांमुळे तो कोणत्याही प्रवासी डब्यात सुरक्षितपणे वाहून नेता येत नसल्याने त्याला परवानगी देण्यात आलेली नाही. मात्र इतर साहित्य सोबत घेऊन प्रवास करता येणार आहे.
ट्रेनमध्ये या वस्तू नेण्यास बंदी
रेल्वेच्या नियमांनुसार काही वस्तू ट्रेनमध्ये नेण्यास सक्त मनाई आहे. यामध्ये पेट्रोल, डिझेल किंवा कोणतेही ज्वलनशील पदार्थ, फटाके, दारूगोळा किंवा स्फोटक साहित्य, गॅस सिलेंडर, शस्त्रे किंवा कोणत्याही प्रकारचे धोकादायक साहित्याचा समावेश आहे. या वस्तू ट्रेनमध्ये आढळल्यास रेल्वेकडून संबंधित प्रवाशाविरुद्ध कारवाई केली जाऊ शकते आणि त्याचबरोबर दंडही आकारला जाऊ शकतो. त्यामुळे या वस्तू कधीही रेल्वे प्रवासात सोबत नेऊ नयेत.
