सिगारेट ते बँकिंग ट्रान्झॅक्शनपर्यंत सर्व काही महागलं; बजेटच्या दिवशीच नवे नियम लागू

आज १ फेब्रुवारी २०२६, देशाच्या अर्थव्यवस्थेसाठी आणि सर्वसामान्यांसाठी अत्यंत महत्त्वाचा दिवस आहे. एकीकडे सर्वांचे डोळे लोकसभेत सादर होणाऱ्या केंद्रीय अर्थसंकल्पाकडे (Budget 2026) लागलेले असताना दुसरीकडे महिन्याच्या पहिल्याच दिवशी सर्वसामान्यांच्या दैनंदिन जीवनाशी संबंधित अनेक नियमांत मोठे बदल करण्यात आले आहेत. आजपासून तुमच्या स्वयंपाकघरातील गॅस सिलिंडरच्या किमतींपासून ते खिशातील क्रेडिट कार्डच्या नियमांपर्यंत आणि महामार्गावरील फास्टॅगपासून ते बँकेतील व्यवहारांपर्यंत अनेक ठिकाणी मोठे बदल झाले आहेत. या बदलांचा थेट परिणाम तुमच्या मासिक बजेटवर आणि दैनंदिन जीवनशैलीवर होणार आहे. यामुळे तुम्हाला काही ठिकाणी दिलासा तर काही ठिकाणी वाढीव खर्चाचा बोजा सोसावा लागणार आहे.

गॅस सिलिंडर आणि इंधन दरवाढीचे संकेत

दर महिन्याप्रमाणे आजही तेल कंपन्यांनी एलपीजी (LPG) सिलिंडरच्या किमतींचा आढावा घेतला आहे. व्यावसायिक सिलिंडरच्या दरात चढ-उतार होण्याची शक्यता वर्तवली जात आहे. मात्र घरगुती गॅसबाबत अद्याप कोणती मोठी घोषणा करण्यात आली आहे. आता याबद्दल अर्थसंकल्पातून काही दिलासा मिळतो का, हे पाहणे महत्त्वाचे ठरेल. त्यासोबतच सीएनजी (CNG) आणि विमान इंधनाच्या (ATF) दरात होणाऱ्या बदलांमुळे तुमचा प्रवास खर्चही वाढण्याची शक्यता आहे.

बँकिंग आणि क्रेडिट कार्डचे नियम कडक

बँकिंग क्षेत्रात आजपासून दोन मोठे बदल पाहायला मिळत आहेत.

SBI चे व्यवहार महागणार: स्टेट बँक ऑफ इंडियाने IMPS शुल्कात बदल केला असून, १५ फेब्रुवारीपासून २५,००० रुपयांवरील ऑनलाईन व्यवहारांवर २ ते १० रुपयांपर्यंत अतिरिक्त शुल्क (अधिक GST) द्यावे लागेल.

क्रेडिट कार्ड ऑफर्सना कात्री: HDFC बँकेने रिवॉर्ड पॉइंट्स रिडीम करण्यावर मर्यादा आणली आहे, तर ICICI बँकेने काही कार्ड्सवर मिळणारी मोफत चित्रपट तिकीट ऑफर बंद करण्याचा निर्णय घेतला आहे.

PNB ग्राहकांसाठी डेडलाईन: पंजाब नॅशनल बँकेच्या ग्राहकांना त्यांचे KYC अपडेट करण्यासाठी २ फेब्रुवारीपर्यंतची शेवटची संधी आहे, अन्यथा खात्यातून व्यवहार करणे कठीण होईल.

वाहनधारकांसाठी दिलासादायक बातमी

रस्ते आणि वाहतूक विभागाने वाहनधारकांना मोठा दिलासा दिला आहे. आता FASTag साठी वाहन मालकांना वारंवार बँकेत जाऊन KYC पडताळणी करण्याची गरज भासणार नाही. ही सर्व जबाबदारी आता संबंधित बँकांकडे सोपवण्यात आली असून, यामुळे वाहनधारकांचा वेळ वाचणार आहे.

व्यसने होणार महाग

आरोग्यासाठी घातक असलेल्या सिगारेट, पान मसाला आणि गुटखा यांसारख्या तंबाखूजन्य पदार्थांवर सरकार अतिरिक्त कर (Cess) लावण्यात येणार आहे. यामुळे आजपासून सिगारेट, पान मसाला आणि गुटखा या वस्तूंच्या किमतीत वाढ होऊन शौकिनांच्या खिशाला चांगलाच फटका बसू शकतो.