NPS Scheme : दरमहा मिळणार 50000 पेन्शन, सरकारच्या या योजनेमुळे व्हाल मालामाल; किती गुंतवावे लागणार?
या योजनेतील गुंतवणूक इक्विटी आणि डेटसारख्या विविध साधनांमध्ये केली जाते. त्यामुळे मिळणारा परतावा भांडवली बाजाराच्या कामगिरीवर अवलंबून असून 9 ते 12 टक्के परतावा मिळू शकतो.
NPS Saving Scheme : आयुष्याच्या उत्तरार्धात जगणं सोपं व्हावं यासाठी जवळ काही पैसे असणे गरजेचे असते. हेच पैसे जवळ असावेत यासाठी अनकेजण वेगवेगळ्या ठिकाणी गुंतवणूक करतात. प्रत्येक महिन्याला एक ठराविक रक्कम मिळावी यासाठी काही लोक वेगवेगळ्या शासकीय योजनांमध्ये गुंतवणूक करतात. दरम्यान, सध्या सरकारच्या एका योजनेची खूप चर्चा होत आहे. या योजनेअंतर्गत तुम्हाला प्रत्येक महिन्याला 50000 हजार रुपये पेन्शन मिळू शकते. म्हणूनच ही योजना नेमकी काय आहे? तुम्हाला प्रत्येक महिन्याला 50 हजार रुपये पेन्शन कसे मिळू शकते, ते जाणून घेऊ या…
निवृत्तीच्या काळात मोठा निधी तयार होऊ शकतो
सरकारच्या या योजनेचे नाव National Pension System (NPS) असे आहे. ही दीर्घकालीन आणि ऐच्छिक निवृत्तीविषयक योजना असून, यात गुंतवणूक केल्यास निवृत्तीच्या काळात मोठा निधी तयार होऊ शकतो. NPS या योजनेवर Pension Fund Regulatory and Development Authority (PFRDA) अंतर्गत देखरेख केली जाते. या योजनेतील गुंतवणूक इक्विटी आणि डेटसारख्या विविध साधनांमध्ये केली जाते. त्यामुळे मिळणारा परतावा भांडवली बाजाराच्या कामगिरीवर अवलंबून असून 9 ते 12 टक्के परतावा मिळू शकतो.
50 हजार रुपयांच्या पेन्शनसाठी किती गुंतवणूक करावी लागेल?
समजा एखाद्या व्यक्तीचे वय 25 वर्षे आहे आणि ती व्यक्ती वयाच्या 60 वर्षांपर्यंत NPS मध्ये गुंतवणूक करते असेल, म्हणजेच गुंतवणुकीचा कालावधी 35 वर्षांचा असेल. या अंदाजानुसार दरमहा सुमारे 14 ते 15 हजार रुपयांची गुंतवणूक केल्यास मोठा निवृत्ती निधी तयार होऊ शकतो. 10 टक्के सरासरी वार्षिक परतावा गृहीत धरल्यास, निवृत्तीच्या वेळी सुमारे 5 कोटी रुपयांचा कॉर्पस तयार होईल. त्यातील 60 टक्के म्हणजेच जवळपास 3 कोटी रुपये एकरकमी काढता येऊ शकतात. उर्वरित 40 टक्के रक्कम म्हणजे सुमारे 2 कोटी रुपये एन्युटीसाठी वापरली जाऊ शकते. एन्युटीवर 6 टक्के परतावा गृहीत धरल्यास, या उदाहरणात दरमहा सुमारे 50 हजार रुपयांची पेन्शन मिळू शकते.
आर्थिक बाबी समजून घेणे आवश्यक
मात्र ही रक्कम अंदाजावर आधारित आहे. प्रत्यक्ष परतावा, एन्युटीचे दर आणि अंतिम पेन्शनची रक्कम बदलू शकते. त्यामुळे NPS मध्ये गुंतवणूक करण्यापूर्वी योजनेचे नियम आणि आर्थिक बाबी समजून घेणे आवश्यक आहे.
(टीप- वरच्या लेखात दिलेली माहिती ही प्राथमिक स्वरुपाची आहे. या लेखाच्या माध्यमातून गुंतवणूक करण्याचा सल्ला दिलेला नाही. कुठेही प्रत्यक्ष वा अप्रत्यक्ष गुंतवणूक करायची असेल किंवा कोणताही आर्थिक निर्णय घ्यायचा असेल तर त्या-त्या क्षेत्रातील तज्ज्ञांचा सल्ला जरूर घ्या)
