Reels च्या नादात Real आयुष्य गमावलं ! नदीकिनारी करत होते शूटिंग, पाय घसरला अन्
लोकांच्या डोक्यात व्हिडीओ बनवण्याचं खूळ एवढं आहे की त्या नादात ते स्वत:च्या जीवाचीही पर्वा करत नाहीत. रील्स बनवताना नदीत पाय घसरून पडल्याने तीन तरूणांसोबत अशीच दुर्घटना घडली.
पाटणा : नजर हटी तो दुर्घटना घटी…. हे वाक्य काही केवळ गाडी चालवताना किंवा प्रवासातच लक्षात ठेवायचे नसते तर रोजच्या आयुष्यातही त्याचा अवलंब करायचा असतो. आजची पिढी खूप टेक्नोसॅव्ही आहे. सतत काही ना काही उद्योग सुरू असतात. त्यातच सध्या सोशल मीडियावर रिल्स (reels) आणि व्हिडीओ (videos on social media) बनवण्याचा खूप ट्रेंड आहे. विशेषतः तरुण मुलांमध्ये त्याची खूपच क्रेझ आहे.
मात्र रील बनवण्याच्या आणि काहीतरी नवीन करण्याच्या इच्छेने ते अशी काही पावलं उचलतात, जे त्यांच्यासाठीच खूप घातक ठरते. असाच एक दुर्दैवी प्रकार बिहारमधील मोतिहारीमध्ये घडला आहे. तेथे रील बनवण्याच्या नादात तीन अल्पवयीन मुलांना जीव गमवावा लागला आहे. चंपारण येथील टिकुलिया गावातील नदीच्या काठावर ही मुलं यूट्यूब चॅनलसाठी व्हिडिओ बनवत होती. मात्र तेवढ्याच त्यांचा पाय घसरून ते नदीत पडले आणि बुडून त्यांचा मृत्यू झाला.
एसडीआरएफच्या पथकाने शोधमोहिम हाती घेत त्यांचे मृतदेह शोधून काढले. मनजीत, पियुष कुमार आणि प्रिन्स अशी मृत मुलांची नावे आहेत. ते १४-१५ वयोगटातील होते. या घटनेमुळे संपूर्ण गावावर शोककळा पसरली आहे.
एकाला वाचवताना इतर दोघेही बुडाले
स्थानिकांनी दिलेल्या माहितीनुसार, ही तीनही मुलं नदीच्या काठावर रील बनवत होते. यादरम्यान एका मुलाचा पाय घसरला आणि तो पाण्यात बुडू लागला. त्याला वाचवण्यासाठी इतर दोघांनी नदीत उडी मारली मात्र तेही बुडाले. त्या तिघांना वाचवण्यासाठी स्थानिकांनी खूप प्रयत्न केले, मात्र त्यांना अपयश आले.
SDRF टीमने शोधले मृतदेह
तीनही मुलांचे मृतदेह शोधण्यात गावकऱ्यांना यश मिळाले नाही त्यामुळे SDRF च्या टीमला पाचारण करण्यात आले. त्यांनी तब्बल १० तास मेहनत केल्यानंतर तीनही मुलांचे मृतदेह सापडले. ते शवविच्छेदनासाठी पाठवण्यात आले आहेत.
