नालासोपाऱ्यात पोलिसांची सर्वात मोठी कारवाई; 58 लाख 74 हजाराचे अंमलीपदार्थ जप्त
नालासोपारा येथील प्रगती नगर परिसरात कारवाई करत गुन्हे प्रकटीकरण शाखेने 58 लाखांचे ड्रग जप्त केले. याप्रकरणी एका आरोपीला अटक केली आहे.
नालासोपारा / विजय गायकवाड : नालासोपारा पूर्व प्रगती नगर परिसर हा नायजेरियन नागरिकांचा मोठा अड्डा बनला आहे. याच परिसरात तुळिंज पोलिसांनी मोठी कारवाई करत एका 26 वर्षीय नायजेरियन व्यक्तीला अटक केले. ईदे इम्यानुवेल ईदे पॉल असे अटक नायजेरियन नागरिकाचे नाव आहे. आरोपीकडून 58 लाख 74 हजार रुपये किमतीचे अंमली पदार्थ जप्त केले आहेत. नालासोपारा परिसरातील ही सर्वात मोठी कारवाई असून, अंमली पदार्थसंबंधी आमच्या कारवाया अशाच सुरू राहतील, असे मीरा भाईंदर वसई विरार परिमंडळ 03 चे प्रभारी पोलीस उपयुक्त सुहास बावचे यांनी सांगितले.
गुप्त माहितीच्या आधारे पोलिसांनी सापळा रचला
आरोपी नालासोपारा पूर्व प्रगती नगर परिसरात राहत होता. तुळिंज गुन्हे प्रकटीकरण पथकाला प्रगती नगर परिसरात एका नायजेरियन नागरिकाकडे मोठ्या प्रमाणात अंमली पदार्थाचा साठा असून, तो विक्री करत असल्याची माहिती मिळाली होती. मिळालेल्या माहितीनुसार गुन्हे प्रकटीकरण पथकाने परिसरात सापळा रचला.
तुळिंजचे वरिष्ठ पोलीस निरीक्षक शैलेंद्र नगरकर यांच्या मार्गदर्शनाखाली गुन्हे प्रकटीकरण पथकाचे पीएसआय बाळासाहेब बांदल, सहाय्यक फोजदार शिवानंद सुतनासे, पोलीस हवालदार अनिल शिंदे, आनंद शिंदे, उमेश वरठा यांच्यासह अन्य पथक तयार केले. या पथकाने प्रगती नगर परिसरात सापळा रचला.
आरोपीकडून मोठ्या प्रमाणात मुद्देमाल हस्तगत
यावेळी पोलिसांना पाहून संशयित नायजेरीन व्यक्तीने पळ काढला. मात्र पोलिसांनी पाठलाग करून त्याला पकडले. त्याच्या अंगझडतीत 10 लाख 24 हजार किमतीचे 102.400 ग्रॅम वजनाचे एमडी ड्रग, तर त्याच्या घराची झडती घेतली असता 17 लाख 22 हजार 500 रुपये किमतीचे 171.250 ग्रॅम वजनाचे कोकेन आणि 31 लाख 28 हजार 300 रुपये किमतीचे 223.45 ग्रॅम वजनाचे MDMA, ECSTASY हे अंमलीपदार्थ मिळून आले आहे.
या कारवाईत तुळिंज पोलिसांनी एका नायजेरियन आरोपीसह एकूण 58 लाख 74 हजार रुपये किमतीचे अंमलीपदार्थ जप्त केले आहेत. या प्रकरणात तुळिंज पोलीस ठाण्यात एनडीपीएस कायदा 1985 चे कलम 8 (क), 21 (क), 22 (क) अन्वये गुन्हा दाखल केला. आरोपीला वसई न्यायालयात हजर केले असता 7 दिवसांची पोलीस कोठडी सुनावली आहे. पोलीस कोठडीनंतर हा गुन्हा नार्को टेस्ट विभागाकडे वर्ग करण्यात आला.
