लहान भाऊच मोठ्या भावाच्या जीवावर बेतला, कारण काय?
दोन भावांमध्ये झालेल्या क्षुल्लक वादातून लहान भावाने मोठ्या भावाची हत्या केल्याची घटना बिहारमधील दरभंगा येथे घडली आहे. याप्रकरणी पोलिसांनी आरोपीला अटक केली आहे.
दरभंगा : क्षुल्लक कारणातून लहान भावाने मोठ्या भावाची हत्या केल्याची घटना बिहारमधील दरभंगा जिल्ह्यात घडली आहे. याप्रकरणी पोलिसांनी लहान भावाला अटक केली आहे. माखनपूर गावात ही घटना घडली आहे. दोघा भावांमध्ये अनेक वर्षांपासून रस्त्यावरुन वाद सुरु होते. त्यातच सोमवारी मोठ्या भावाच्या छतावर सुकत घातलेले कपडे छोट्या भावाच्या अंगणात पडल्याच्या कारणातून वाद झाला. याच वादातून लहान भावाने मोठ्या भावाला मारहाण केली. यात मोठ्या भावाचा मृत्यू झाला. सज्जन मंडल असे मयत भावाचे नाव आहे, तर राजेश मंडल असे आरोपी भावाचे नाव आहे.
काय आहे नेमके प्रकरण?
मयत सज्जन मंडलच्या घरच्यांनी घराच्या छतावर कपडे सुकत घातले होते. हवेमुळे कपडे उडाले आणि राजेश मंडलच्या अंगणात पडले. हे कपडे आणण्यासाठी सज्जन मंडलची नात गेली होती. यावेळी राजेश मंडलने कपडे जाळण्याचे आणि मुलीला मारहाण करण्याची भाषा करत मुलीला हाकलून दिले.
यावरुन दोघा भावांमध्ये वाद सुरु झाला. वाद इतका विकोपाला गेला की, राजेश मंडलने सज्जनला खाली जमिनीवर ढकलले. यानंतर त्याला जोरदार मारहाण सुरु केली. मारहाणीनंतर सज्जन मंडलची तब्येत बिघडली. त्यांना तात्काळ रुग्णालयात दाखल करण्यात आले, मात्र डॉक्टरांनी त्याला मृत घोषित केले.
याप्रकरणी मयत सज्जन मंडलचा मुलगा विजय मंडलने दिलेल्या तक्रारीवरुन पोलिसांनी हत्येचा गुन्हा दाखल करत आरोपीला अटक केली आहे. पोलीस चौकशीत आरोपीने गुन्ह्याची नोंद करण्यात आली आहे. आरोपीला न्यायालयात हजर केले असता न्यायालयाने त्याला न्यायालयीन कोठडी सुनावली आहे.
