अल्पवयीन मुलीला पळवून नेत लैंगिक अत्याचार, आरोपी अखेर पोलिसांच्या जाळ्यात

गोंदिया / शाहिद पठाण : अल्पवयीन मुलीला पळवून नेत मग विनयभंग आणि लैंगिक अत्याचार करणाऱ्या फरार आरोपीला पकडण्यास पोलिसांना अखेर यश आले आहे. मनोज टेकाम असे अटक करण्यात आलेल्या आरोपीचे नाव आहे. घटनेच्या दिवसापासू आरोपी फरार होता. गोंदिया स्थानिक गुन्हे शाखेने कारवाई करत आरोपीला जेरबंद केले. आरोपीविरोधात कलम 376, (2) (एन), 363, 353 भादंवि, सहकलम 4, 6, 8, 12 लैंगिक अपराधापासून बालकांचे संरक्षण अधिनियम 2012 अन्वये दाखल गुन्ह्या दाखल होता.

घटना उघड होताच आरोपी होता फरार

मक्कीटोला येथील आरोपी मनोज टेकाम याने गावातील अल्पवयीन मुलीचे अपहरण करत तिचा विनयभंग आणि लैंगिक अत्याचार केल्याची घटना जानेवारीमध्ये घडली होती. घटना उघडकीस येताच आरोपी फरार झाला होता. दोन महिन्यांपासून फरार आरोपीचा शोध घेण्यासाठी स्थानिक गुन्हे शाखेचे पथक पोलीस निरीक्षक दिनेश लबडे यांच्या मार्गदर्शनाखाली पोलीस तपास करत होते.

गोंदिया स्टेशन परिसरात सापळा रचून आरोपीला अटक

यादरम्यान फरार आरोपी गोंदिया स्टेशन परिसरात आल्याची गुप्त माहिती पोलिसांना मिळाली. मिळालेल्या माहितीनुसार स्थानिक गुन्हे शाखा पोलिसांनी गोंदिया स्टेशन परिसरात सापळा रचून आरोपीला अटक केली. यानंतर सखोल चौकशीसाठी आरोपीला गोंदिया शहर पोलिसांच्या ताब्यात देण्यात आले. पुढील कायदेशीर कारवाई गोंदिया शहर पोलीस करीत आहेत.

स्थानिक गुन्हे शाखेचे पोलीस निरीक्षक दिनेश लबडे यांच्या मार्गदर्शनाखाली पोउपनि महेश विघ्ने, पोलीस अंमलदार पोहवा प्रकाश गायधने, विठठल ठाकरे, चेतन पटले, पोलीस शिपाई हंसराज भांडारकर यांनी सदरची उल्लेखनीय कामगिरी केली.