बॉडी बिल्डर मुलाकडून आई-वडिलांवर हल्ला, हल्ल्यानंतर तरुण फरार, कारण काय?

ठाणे : ठाणे शहरात एक भयंकर घटना उघडकीस आली आहे. एका बॉडी बिल्डर असलेल्या मुलाने आपल्या आई-वडिलांवर जीवघेणा हल्ला केल्याची घटना ठाण्यातील कासारवडवली परिसरात घडली आहे. या घटनेत आई वडील दोघेही गंभीर जखमी झाले असून, त्यांच्यावर खाजगी रुग्णालयात उपचार सुरु आहेत. दोघांची प्रकृती चिंताजनक आहे. संकल्प भाटकर असे 35 वर्षीय आरोपी तरुणाचे नाव आहे. घटनेनंतर तरुण फरार झाला आहे. याप्रकरणी कासारवडवली पोलीस ठाण्यात गुन्हा दाखल करण्यात आला असून, पोलीस त्याचा शोध घेत आहेत.

आई-वडिलांवर हल्ला केल्यानंतर आरोपी फरार झाला

ठाणे पश्चिम येथील कासारवडवली परिसरात विहंग व्हॅली इमारतीत आज सकाळी 11.15 च्या सुमारास ही घटना घडली. संकल्प भाटकर हा तरुण आपल्या आई-वडिलांसोबत येथे राहतो. आज सकाळी त्याने आपल्या आई-वडिलांवर जीवघेणा हल्ला करत त्यांना गंभीर जखमी केले. हल्ल्याचे कारण अद्याप समजले नाही. यानंतर तो आपल्या बाईकवरुन पळून गेला.

कासारवडवली पोलिसांकडून लुकआऊट नोटीस जारी

घटनेची माहिती मिळताच कासारवडवली पोलिसांनी घटनास्थळी धाव घेत जखमी वृद्ध जोडप्याला रुग्णालयात दाखल केले. शेजाऱ्यांनी दिलेल्या माहितीनुसार, आरोपी संकल्प हा बॉडी बिल्डर आहे आणि तो स्टेरॉईड्स घेत असे. तसेच तो सायको आहे. यानंतर पोलिसांनी संकल्प भाटकरसाठी लुकआउट परिपत्रक काढले आहे. आरोपीजवळ कांदा कटर आहे. संकल्प कुठेही दिसल्यास पोलिसांना त्वरीत कळवण्याचे आवाहन कासारवडवली पोलिसांनी केले आहे.