व्हिडिओ व्हायरल का केला? जाब विचारणाऱ्या तरूणाची बोटं छाटली, कुठे घडला धक्कादायक प्रकार ?
बीडमध्ये एका तरुणाची त्याच्या मित्रानेच बोटे छाटण्याची धक्कादायक घटना घडली आहे. व्हायरल झालेल्या व्हिडिओबाबत झालेल्या वादातून हा प्रकार घडला. मारहाण झालेल्या तरुणाने व्हिडिओ व्हायरल केल्यावरून जाब विचारला आणि त्यातून हा क्रूर प्रकार घडला. पोलिसांनी या प्रकरणी एका आरोपीला अटक केली असून उर्वरित आरोपींचा शोध सुरू आहे. या घटनेमुळे बीडमध्ये दहशतीचे वातावरण पसरले आहे.
बीडमध्ये गेल्या अनेक महिन्यांपासून गुन्हेगारीच्या वाढत्या घटना घडत असून त्यामुळे गावात व आसपासच्या परिसरातही दहशतीचे वातावरण आहे. त्यातच आता बीडमधून आणखी एक धक्कादायक बातमी समोर आली आहे. व्हिडीओ व्हायरल केल्याचा जाब विचारणाऱ्या तरूणाची बोटं छाटण्याता आल्याचा अत्यंत हादरवणारा प्रकार बीडमध्ये घडला आहे. मित्रानेच मित्राची बोट छाटल्याने मोठी खळबळ उडाली आहे. याप्रकरणी पेठ पोलीस स्टेशनमध्ये 4 जणांविरोधात गुन्हा दाखल करण्यात आला आहे तर एका व्यक्तीला बेड्या ठोकत पोलिसांनी अटक केल्याची माहिती समोर आली आहे.
नक्की काय घडलं ?
बीडमध्ये कोयता आणि सत्तुरने एका तरुणाला धमकावून व्हिडिओ समाज माध्यमांवर व्हायरल करण्यात आला. हा व्हिडिओ व्हायरल का केला? याचा जाब मारहाण झालेल्या तरुणाने विचारला. आणि हाच राग मनात धरून तरुणाच्या हाताची बोटं छाटण्यात आल्याचा धक्कादायक प्रकार बीड शहरात घडला. याप्रकरणी चार जणांवर पेठ बीड पोलिस ठाण्यात गुन्हा दाखल करण्यात आला आहे.
मित्रानेच मित्राची छाटली बोटं
तीन दिवसांपूर्वी शेख अलीम अनिस या तरुणाला चार जणांच्या टोळक्याकडुन कोयता आणि सत्तुरने धमकावले जात असल्याचा व्हिडिओ व्हायरल करण्यात आला. या घटनेतील मुख्य आरोपी मारहाण झालेल्या तरुणाचा मित्रच आहे. हा व्हिडिओ इतर मित्रांना का दाखवतो? याचा जाब अनिसने विचारला असता, त्याच्या मित्राने गाडीवर बसवून अज्ञात स्थळी नेत मारहाण केली. या मारहाणीत तरुणाचे बोट छाटण्यात आले.
दरम्यान या प्रकरणी पेठ बीड पोलीस ठाण्यात चार जणांविरोधात गुन्हा दाखल करण्यात आला असून एका आरोपीला पोलिसांनी अटक केली आहे. उर्वरित तीन आरोपींचा शोध पोलीस घेत आहेत. खून, दरोडा, विनयभंगासारख्या घटना ताज्या असताना आता मित्रानेच मित्राचे बोटे छाटल्याने बीड मध्ये मात्र पुन्हा दहशतीचे वातावरण पसरले आहे.
