दोन्ही सुनांचं भांडण सुरु होतं, सासरा मध्ये सोडवायला, पण पुढे जे घडलं ते भयंकर
सुनांचं भांडण सुरु होतं. सासरा सोडवायला गेला. पण सुनांनी सासऱ्याचं ऐकायच्या ऐवजी भलंतच कृत्य केलं. मग सासरा संतपला अन् घडू नये ते घडलं.
आग्रा : उत्तर प्रदेशात एक भयंकर घटना समोर आली आहे. सुनांचं भांडण सोडवायला गेलेला सासरा भलतंच करुन बसला. यानंतर सासऱ्याची थेट तुरुंगात रवानगी झाली. सुनांचं भांडण सोडवत असताना लहान सुनेने सासऱ्याला लाथ मारली. यानंतर संतापलेल्या सासऱ्याने कुऱ्हाडीने वार करुन लहान सुनेची हत्या केली. या घटनेमुळे गावात एकच खळबळ माजली आहे. प्रियंका सिंह असे मयत सुनेचे तर रघुवीर सिंह असे आरोपी सासऱ्याचे नाव आहे. सुनेची हत्या केल्यानंतर सासऱ्याने स्वतःहून पोलीस ठाण्यात हजर होत गुन्ह्याची कबुली दिली. यानंतर पोलिसांनी घटनास्थळी दाखल होत महिलेचा मृतदेह ताब्यात घेत शवविच्छेदनासाठी पाठवला.
आग्रा येथील मलिकपूर गावात ही धक्कादायक घटना घडली. रघुवीर सिंह यांना दोन मुलगे असून, ते पोलीस कॉन्स्टेबल आहेत. दोन्ही मुलांचा विवाह मथुरा येथील दोघी सख्या बहिणींसोबत झाला होता. मात्र 4 वर्षापूर्वी मोठ्या सुनेचा मृत्यू झाला. यानंतर मोठ्या मुलाने दुसरा विवाह केला. मात्र दीड वर्षापूर्वी मोठ्या मुलाचाही मृत्यू झाला.
काय घडलं नेमकं?
मोठी सून धर्मवती आणि छोटी सून प्रियंका यांचे जोरदार भांडण सुरु होते. रघुवीर मध्ये सोडवायला गेला. मात्र भांडण सोडवायला आलेल्या सासऱ्याला छोटी सून प्रियंकाने लाथ मारली. यामुळे सासऱ्याचा संताप झाला होता. अखेर सकाळ होताच सासऱ्याने कुऱ्हाडीने प्रियंकावर वार केले आणि तिची हत्या केली. यानंतर थेट पोलीस ठाणे गाठले आणि सर्व हकीकत सांगितली. पोलिसांनी हत्येत वापरलेली कुऱ्हाडही जप्त केली आहे. पोलिसांनी आरोपी सासऱ्याला अटक केली आहे.
