मुलाची तब्येत बिघडली म्हणून दवाखान्यात नेले, मात्र पुढे जे घडले त्यानंतर सर्वांच्याच पायाखालची जमीन सरकली !
मुलाची तब्येत बिघडल्याने मुलाला रुग्णालयात नेण्यात आले. मात्र डॉक्टरांनी तपासल्यानंतर त्याला मृत घोषित केले. यानंतर मृतदेह शवविच्छेदनासाठी पाठवण्यात आला. शवविच्छेदन अहवाल आल्यानंतर सर्वच चक्रावले.
फरीदाबाद : स्वतःचे मूल पाहिजे होते म्हणून 4 वर्षाच्या मुलाची सावत्र आईने हत्या केल्याची धक्कादायक घटना ग्रेटर फरीदाबादमधील बडौली गावात घडली आहे. हत्या केल्यानंतर आजारपणामुळे मुलाचा मृत्यू झाल्याचे भासवण्याचा प्रयत्न केला, मात्र शवविच्छेदन अहवालामुळे महिलेची पोलखोल झाली. पोलिसांनी आरोपी सावत्र आईला अटक केली आहे. पोलीस पुढील तपास करत आहेत. बडौली गावात राहणारे देवीदीन पटेल याच्या पहिल्या पत्नीचा मृत्यू झाला. देवीदीनला पहिल्या पत्नीपासून 9 वर्षाचा आणि 4 वर्षाचा अशी दोन मुलं आहेत.
स्वतःचे मूल हवे होते म्हणून सावत्र मुलाचा काटा काढला
पत्नीच्या मृत्यूनंतर मुलांचे संगोपन करण्यासाठी त्यांनी शेजारच्या गावात राहणाऱ्या या महिलेशी अडीच वर्षापूर्वी दुसरा विवाह केला. महिलेचाही हा दुसरा विवाह आहे. महिलेला पतीपासून स्वतःचे मूल पाहिजे होते. मात्र पतीला मूल नको हवे होते. या कारणातून दोघांमध्ये नेहमी वाद व्हायचे. याच रागातून महिलेने 4 वर्षाच्या सावत्र मुलाला गळा आवळून संपवले.
शवविच्छेदन अहवालानंतर हत्येचा उलगडा
मुलाची तब्येत बिघडल्याने मुलाला रुग्णालयात नेण्यात आले. मात्र डॉक्टरांनी तपासल्यानंतर त्याला मृत घोषित केले. यानंतर मृतदेह शवविच्छेदनासाठी पाठवण्यात आला. शवविच्छेदन अहवाल आल्यानंतर सर्वच चक्रावले. शवविच्छेदन अहवालात मुलाचा मृत्यू आजारपणामुळे झाला नसून, गळा दाबून हत्या केल्याचे उघड झाले. यानंतर पोलिसांनी हत्येचा गुन्हा दाखल करत तपास सुरु केला.
आरोपी महिलेला अटक
तपासादरम्यान सावत्र आईनेच मुलाची गळा आवळून हत्या केल्याचे उघडकीस आले. यानंतर पोलिसांनी हत्येचा गुन्हा दाखल करत आरोपी महिलेला अटक केली. पोलीस याप्रकरणी सखोल तपास करत आहेत.
