Navi Mumbai Crime : नवी मुंबईत अवैध गावठी पिस्टलसह जिवंत काडतुसे जप्त, एपीएमसी पोलिसांकडून दोन आरोपींना अटक
आरोपी सलमान हा MH 43 या हॉटेलमध्ये येणार असल्याची माहिती पोलिसांनी मिळाली होती. त्यानुसार पोलिसांनी सापळा रचून आरोपींच्या मुसक्या आवळल्या आहेत.
नवी मुंबई : नवी मुंबईतील हिट अँड रन प्रकरणातील आरोपीं (Accused)ना पकडण्यास एपीएमसी पोलिसांना यश आले असून, आरोपींकडून गावठी पिस्तुल (Pistol)सह जिवंत काडतुसे (Cartridge) जप्त करण्यात आली आहेत. सलमान कलदाणी (24) आणि जितेंद्रसिंग भदोरीया (26) अशी अटक करण्यात आलेल्या आरोपींची नावे आहेत. आरोपी सलमान हा MH 43 या हॉटेलमध्ये येणार असल्याची माहिती पोलिसांनी मिळाली होती. त्यानुसार पोलिसांनी सापळा रचून आरोपींच्या मुसक्या आवळल्या आहेत. दोन्ही आरोपींना न्यायालयात हजर केले असता न्यायालयाने त्यांना दोन दिवसांची पोलीस कोठडी सुनावली आहे, अशी माहिती पोलीस उपायुक्त विवेक पानसरे यांनी दिली.
गुप्त माहितीच्या आधारे पोलिसांनी सापळा रचून आरोपीला अटक केले
नवी मुंबईतील कोपरी गावात एका भरधाव वेगातील स्विफ्ट कारने फुटपाथवरुन चाललेल्या 80 वर्षीय वृद्धाला धडक दिली होती. या धडकेत जखमी झालेल्या वृद्धाचा रुग्णालयात उपचारादरम्यान मृत्यू झाला. अपघातानंतर आरोपी कारचालक घटनास्थळावरुन फरार झाला होता. पोलीस आरोपीचा कसून शोध घेत होते. या प्रकरणातील फरार आरोपी MH 43 या हॉटेलमध्ये येणार असल्याची गु्प्त माहिती पोलिसांना मिळाली होती. मिळालेल्या माहितीनुसार, पोलिसांनी या हॉटेलच्या परिसरात सापळा रचला. यावेळी एक संशयास्पद कार हॉटेलजवळ फिरताना पोलिसांना दिसली. पोलिसांनी ही कार ताब्यात घेत तपासणी केली असता आत फरार आरोपी सलमान कलदाणी आणि त्याचा साथीदार जितेंद्रसिंग भदोरिया आढळून आले. पोलिसांनी दोघांना ताब्यात घेत कारची झडती घेतली असता कारमध्ये एक देशी बनावटीचा कट्टा आणि एक जिवंत काडतूस आढळले. याप्रकरणी एपीएमसी पोलीस स्टेशनचे वरिष्ठ पोलीस निरीक्षक माणिक नलावडे अधिक तपास करत आहेत. (Illegal village pistol along with live cartridges seized in Navi Mumbai, two accused arrested)
