‘त्या’ दोघांचे एकमेकांवर जीवापाड प्रेम, अचानक दोघांमध्ये दुरावा निर्माण झाला, तरुणाला दुरावा सहन झाला नाही अन्…
दोघांचे प्रेमसंबंध सुरु होते. पण अचानक दोघांमध्ये दुरावा निर्माण झाला. पण हा दुरावा तरुणाला सहन झाला नाही. मग जे घडले त्याची कुणी कल्पनाही केली नसेल.
रांची : झारखंडची राजधानी रांचीमध्ये एक विचित्र घटना घडली आहे. प्रेमात आलेला दुरावा सहन न झाल्याने प्रियकराने प्रेयसीची हत्या करत मग स्वतःही जीवन संपवल्याची घटना घडली आहे. मृत्यूपूर्वी तरुणाने फेसबुक लाईव्ह करत प्रेयसीच्या हत्येची माहिती दिली. मग आपणही तिच्याकडे जात आहे म्हणत जीवन संपवले. तसेच आपल्या बहिणींना स्वतःचे लोकेशनही पाठवले. अंकित असे मयत तरुणाचे नाव आहे. अर्गोरा पोलीस स्टेशन हद्दीतील हरमू परिसर शुक्रवारी संध्याकाळी ही घटना घडली. पोलीस त्याचे लोकेशन ट्रेस करत त्याच्यापर्यंत पोहचत होते. पण तत्पूर्वीच त्याचा मृत्यू झाला होता.
निवेदिताच्या घरच्यांमुळे दोघांमध्ये दुरावा आला
मिळालेल्या माहितीनुसार, निवेदिता आणि अंकित यांचे एकमेकांवर प्रेम होते. पण दोघांच्या नात्याची माहिती निवेदिताच्या घरच्यांना झाली. यानंतर निवेदिता अंकितपासून दूर राहू लागली. अंकितने फोन करु नये म्हणून निवेदिताने आपला मोबाईल नंबरही बदलला. पण अंकितच्या डोक्यातून प्रेमाचे वेड जात नव्हते. निवेदिता आणि त्याच्यामधीव दुरावा त्याला सहन होत नव्हता.
दुरावा सहन होत नसल्याने उचलले टोकाचे पाऊल
यातूनच अंकितने शुक्रवारी सायंकाळी निवेदितावर गोळ्या झाडून तिची हत्या केली. निवेदिताची हत्या केल्यानंतर अंकित तेथून पळून गेला. घटनेची माहिती मिळताच सदर पोलिसांनी घटनास्थळी दाखल होत निवेदिताचा मृतदेह ताब्यात घेत शवविच्छेदनासाठी रुग्णालयात पाठवला. एफएसएल टीमने घटनास्थळी दाखल होत तपास सुरु केला.
निवेदिताच्या हत्येप्रकरणी अंकितचे नाव समोर येताच पोलीस त्याला अटक करण्याचा प्रयत्न करत होते, मात्र पोलीस अंकितपर्यंत पोहोचण्याआधीच अंकितने स्वत:वर गोळी झाडली आणि त्यात त्याचा मृत्यू झाला. ज्या पिस्तुलाने त्याने आपल्या मैत्रिणीची हत्या केली होती, त्याच पिस्तुलाने अंकितने दुसऱ्या दिवशी स्वतःवर गोळी झाडली. मरण्यापूर्वी अंकितने फेसबुक लाईव्ह करत प्रेयसीची हत्या केल्याची कबुली देत आपणही तिच्याकडे जात असल्याचे सांगितले. तसेच त्याने आपल्या बहिणींना आपले लोकेशनही पाठवले होते.
