रात्री रुममध्ये झोपला होता पती, सकाळी जमिनीतून मृतदेह निघाला; नेमके काय घडले?

कानपूर : पती-पत्नीतील वादातून पतीची निर्दयीपणे हत्या केल्याची घटना उत्तर प्रदेशातील कानपूरमध्ये घडली आहे. प्रकरण उघडकीस येताच कुटुंबीयांसह पोलीसही चक्रावून गेले. पत्नीने पतीची हत्या केल्यानंतर मृतदेह रुममध्येच गाडला. सकाळी कुटुंबीयांनी मुलाबद्दल विचारले असता तिने काहीच उत्तर दिले नाही. यामुळे घरच्यांना संशय आला आणि त्यांनी पोलिसांना बोलावले. पोलिसांनी पत्नीची कसून चौकशी केली असता तिने हत्येची कबुली दिली. पोलिसांनी आरोपी पत्नीला अटक केली आहे. मोनिका यादव असे आरोपी पत्नीचे तर उमेश यादव असे हत्या करण्यात आलेल्या पतीचे नाव आहे.

पतीशी वाद झाल्यानंतर त्याची हत्या केली

उमेशला दारुचे व्यसन होते. यावरुन पती-पत्नीमध्ये नेहमी वाद व्हायचे. बुधवारी रात्री नेहमीप्रमाणे दोघांमध्ये वाद झाला. यामुळे मोनिकाच्या मनात पतीवर राग होता. रात्री पती झोपल्यानंतर मोनिकाने पतीची गळा चिरुन हत्या केली. हत्या केल्यानंतर गुन्हा लपवण्यासाठी पतीचा मृतदेह तिने खोलीतच गाडला.

सकाळी घरच्यांनी शोध सुरु केला असता घटना उघडकीस

सकाळी घरच्यांनी उमेश कुठे दिसत नाही म्हणून मोनिकाला विचारले. मात्र मोनिकाने काहीच उत्तर दिले नाही. यामुळे घरच्यांना संशय आला. त्यांनी पोलिसांना माहिती दिली. पोलिसांनी घटनास्थळी दाखल होत मोनिकाची चौकशी केली.

याचदरम्यान पोलिसांचे लक्ष मृतदेह जेथे पुरला होता त्या ठिकाणी गेले. पोलिसांनी तेथील माती बाजूला केली असता जमिनीत उमेशचा मृतदेह आढळला. या घटनेमुळे कुटुंबीय आणि पोलीस सुन्न झाले.

पोलिसांकडून आरोपी पत्नीला अटक

यानंतर पोलिसांनी मोनिकाची कसून चौकशी केली असता तिने हत्येची कबुली दिली. यानंतर पोलिसांनी मोनिकाविरोधात हत्येचा गुन्हा दाखल करत, तिला अटक केली आहे. दरम्यान, घटनेची माहिती मिळताच परिसरात एकच खळबळ माजली आहे.