दिरासोबत हसून बोलणे पतीला पसंत नव्हते, वारंवार समजावूनही पत्नी ऐकत नव्हती; मग…

सिहोर : पत्नी दिरासोबत हसून बोलायची म्हणून संतापलेल्या पतीने पत्नीची कुऱ्हाडीने वार करुन हत्या केल्याची खळबळजनक घटना मध्य प्रदेशातील सिहोर जिल्ह्यात घडली आहे. या घटनेमुळे परिसरात खळबळ उडाली आहे. पोलिसांनी आरोपी पतीला अटक केली आहे. याप्रकरणी पोलीस अधिक चौकशी करत आहेत. रेखाबाई असे हत्या करण्यात आलेल्या 22 वर्षीय पत्नीचे नाव आहे. तर सिताराम भिलाला असे आरोपी पतीचे नाव आहे. घटनेची माहिती मिळताच पोलिसांनी घटनास्थळी धाव घेत मृतदेह ताब्यात घेतला. शवविच्छेदनानंतर मृतदेह नातेवाईकांच्या ताब्यात देण्यात आला.

पत्नीचे भावासोबत हसून बोलणे पसंत नव्हते

जामली गावात राहणारा सिताराम भिलाला याची पत्नी रेखाबाई ही आपल्या लहान भावाशी हसून बोलायची हे त्याला पसंत नव्हते. याबाबत त्याने वारंवार पत्नीला भावापासून दूर रहायला सांगितले. पण ती ऐकत नव्हती. यामुळे भावाचे आणि पत्नीचे अनैतिक संबंध असल्याचा पतीला संशय होता.

कुऱ्हाडीने वार करुन पत्नीची हत्या

याच संशयातून त्याचे काल रात्री पत्नीसोबत भांडण झाले. यानंतर पतीने पत्नीची कुऱ्हाडीने वार करुन हत्या केली. जामली गावात एका महिलेचा मृतदेह रक्ताच्या थारोळ्यात पडला असल्याची माहिती इछावर पोलिसांना मिळाली होती. घटनेची माहिती मिळताच पोलीस घटनास्थळी दाखल झाले. पोलिसांनी घटनास्थळी दाखल होत मृतदेह ताब्यात घेत शवविच्छेदनासाठी रुग्णालयात पाठवला.

पतीला पोलिसांकडून अटक

पोलिसांनी जेव्हा नातेवाईकांकडे चौकशी केली असता महिलेच्या पतीवर संशय व्यक्त केला. यानंतर पोलिसांनी पतीला ताब्यात घेत त्याची चौकशी केली असता आधी पोलिसांची दिशाभूल करण्याचा प्रयत्न केला. मात्र पोलिसी खाक्या दाखवताच आरोपीने सर्व गुन्हा कबूल केला. पत्नीचे आपल्या लहान भावासोबत हसून बोलणे आपल्याला पसंत नसल्याने आपण हे कृत्य केल्याचे त्याने पोलिसांना सांगितले.