वैवाहिक वादाला कंटाळून पत्नी माहेरी राहत होती, पती घरी न्यायला आला असता महिलेने नकार दिला; मग…

गाझियाबाद : रागाने माहेरी आलेली पत्नी सासरी यायला तयार नसल्याने संतापलेल्या पतीने चाकून वार करुन तिची हत्या केल्याची धक्कादायक घटना उत्तर प्रदेशातील गाझियाबादमध्ये घडली आहे. पत्नीची हत्या केल्यानंतर आरोपी पती फरार झाला. गाझियाबादमधील आर्यनगरमध्ये ही घटना घडली आहे. काही वेळाने महिलेच्या घरचे रुममध्ये गेले असता हत्येची घटना उघड झाली. याप्रकरणी महिलेच्या नातेवाईकांच्या तक्रारीवरुन कोतवाली पोलीस ठाण्यात हत्येचा गुन्हा दाखल करण्यात आला आहे. वंशिका असे हत्या करण्यात आलेल्या महिलेचे नाव आहे, तर नरेश असे हत्या करणाऱ्या आरोपी पतीचे नाव आहे. पोलीस फरार आरोपीचा शोध घेत आहेत.

सततच्या भांडणाला कंटाळून महिला माहेरी राहत होती

मयत वंशिका आणि आरोपी नरेशचे दोन वर्षांपूर्वी लग्न झाले होते. लग्नानंतर पती-पत्नीमध्ये घरगुती कारणावरुन सतत भांडण होत होते. याच भांडणाला कंटाळून पत्नी गेल्या सहा महिन्यांपासून माहेरी राहत होती. शुक्रवारी रात्री नरेश सासरवाडीला आला आणि पत्नीला घरी परत येण्यासाठी सांगत होता.

पत्नी घरी यायला तयार नसल्याने पतीने चाकूने भोसकले

वंशिकाने पतीसोबत सासरी परत जाण्यास नकार दिला. यावरुन बराच वेळ दोघांमध्ये बोलणे सुरु होते. पती पत्नीची समजूत काढण्याचा प्रयत्न करत होता. यादरम्यान, पतीने पत्नीने रुममध्ये जाऊन बोलूया सांगत छतावरील खोलीत नेले. खोलीत जाताच पतीने चाकू काढला आणि पत्नीच्या पोटावर, गळ्यावर, चेहऱ्यावर वार केले. यानंतर पती फरार झाला.

पतीविरोधात हत्येचा गुन्हा दाखल

बराच वेळ झाला तरी वंशिका खाली आली नाही म्हणून घरचे लोक रुममध्ये पहायला गेले असता महिला रक्ताच्या थारोळ्यात पडलेली आढळली. नातेवाईकांनी तात्काळ तिला रुग्णालयात नेले, मात्र डॉक्टरांनी तिला मृत घोषित केले. यानंतर वंशिका घरच्यांच्या फिर्यादीवरुन पोलिसांनी पतीविरोधात हत्येचा गुन्हा दाखल केला आहे.