Kolhapur CCTV : खोट्या नोटा गाडीसमोर टाकल्या, आजोबांना बोलण्यात गुंतवलं! मग हळूच गाडीतून मोबाईल-बॅग लंपास

Kolhapur Shahupuri Crime: दिवसाढवळ्या या माणसाला लुटण्यात आल्याचं सीसीटीव्ही फुटेजमुळे उघडकीस आलंय. कोल्हापूरच्या शाहूपुरी भागात ही घटना घडली.

कोल्हापुरातील चोरीची घटना सीसीटीव्हीत कैदImage Credit source: TV9 Marathi

Reporter Bhushan Patil | Edited By: सिद्धेश सावंत | Updated on: Apr 19, 2022 | 1:51 PM

कोल्हापूर : कोल्हापुरात (Kolhapur Crime) एका वृद्ध माणसाला लुटण्यात आलंय. गाडीत बसलेल्या या माणसाचा मोबाईल आणि बॅग लंपास करण्यात आली. ही घटना सीसीटीव्ही कॅमेऱ्यात कैद झाली आहे. दिवसाढवळ्या या माणसाला लुटण्यात (Old men Loot) आल्याचं सीसीटीव्ही फुटेजमुळे (CCTV Video) उघडकीस आलंय. कोल्हापूरच्या शाहूपुरी भागात ही घटना घडली. आधी या वृद्ध माणसाच्या गाडीसमोर खोट्या नोटा फेकण्यात आल्या. त्यानंतर काहींनी गाडीच्या आजूबाजूला टेहाळणी केली. मग खोट्या नोटा पडल्याचं सांगून आजोबांना गाडीचा दरवाजा उघण्यास प्रवृत्त केलं. त्यानंतर हळूच साईड सीटचा दरवाजा उघडला. सीटवरची बॅग आणि मोबाईल फोनवर हात साफ केला आणि मग बेमालूमपणे हे सगळेजण पसार झाले. यात कुठे धावपळ, गडबड, गोंधळ घडल्याचं दिसत नाहीये. वृद्ध व्यक्तीला बोलण्याच्या नादात गुंतवून चोरांची चलाखीनं बॅग आणि मोबाईल लांबवलाय.

नेमकं झालं काय?

कोल्हापुरातील शाहूपुरीत एक मारुची सुझुकीची सिलारीओ कार उभी होती. एक वृद्ध व्यक्ती या कारच्या ड्रायव्हिंग सीटवर बसलेली दिसते. दरम्यान, सुरुवातील काही लोक या गाडीच्या आजूबाजूला टेहाळणी करतात.

त्यानंतर एक जण आपल्याच खिशातून नोट खाली रस्त्यावर पाडतो. या सगळ्यांपैकी एक इसम काचेतून बोलण्याचा प्रयत्न करतो. तुमचे पैसे पडल्याचं वृद्ध व्यक्तीला सांगतो. वृद्ध व्यक्तीही पैसे पडले असावेत, या शंकेनं गाडीचा दरवाडा उघडतो आणि इथेच सगळा घोळ होतो.

आणि सगळ्यांनी धूम ठोकली

वृद्ध व्यक्तीनं गाडीचा दरवाजा उघडताच तो खाली वाकून पैसे पाहतो. एक माणूस त्याला पैसे उचलूनही देताना व्हिडीओमध्ये दिसला आहे. या सगळ्या गडबडीत ड्रायव्हिंग सीटच्या बाजूचा दरवाजा एक जण हळूच उघडतो. सीटवर ठेवलेली बॅग आणि मोबाईल फोन हातचलाखीनं बाहरे काढतो आणि अलगद दरवाजा बंद करुन धूम ठोकतो. त्यानंतर हळूहळू सगळेकडे पसार होतात. इतक्यात गाडीत बसलेल्या वृद्ध व्यक्तीला आपली बॅग आणि मोबाईल चोरीला गेल्याचं ध्यानात येतं. मात्र तोपर्यंत सगळेच पसार झालेले असतात.

या चोरीचं संपूर्ण सीसीटीव्ही समोर आलेलं असून आता पोलिसांसमोर या चोरट्यांचा शोध घेण्याचं आव्हान उभं ठाकलंय. शाहूपुरी पोलिस ठाण्याच्या हद्दीत घडलेल्या या घटनेनं गाडीत बसलेल्यांना लुटणाऱ्यांपासून सावध राहण्याचं आणि सतर्कता बाळगण्याचंही आवाहन केलं जातंय.

पाहा व्हिडीओ :

#Video | दिवसाढवळ्या बनावट नोटा गाडीच्या जवळ टाकून वृद्ध व्यक्तींना लुटलं, पाहा नेमकं काय घडलं? #Kolhapur #cctvfootage #maharashtranews #MaharashtraPolice #crime pic.twitter.com/wVWNCdqyxo

— TV9 Marathi (@TV9Marathi) April 19, 2022