Kalyan Crime : एसी रिपेरिंगच्या नावाखाली रेकी करायचे, मग संधी साधत घरफोडी करुन ऐवज लुटायचे; सीसीटीव्हीच्या आधारे पोलिसांनी ठोकल्या बेड्या
एसी रिपेरिंगसाठी जेथे जायचा त्या इमारतीची पूर्ण रेकी करायचा. इमारतीत कोणते घर बंद आहे ते हेरायचा. त्यानंतर आपला साथीदार भावेशच्या मदतीने तो त्या इमारतीत घरफोडी करत घरातील ऐवज लुटून पसार व्हायचा.
कल्याण : एसी रिपेरिंगच्या नावाखाली रेकी करत मग घरफोडी (Robbery) करुन ऐवज लुटणाऱ्या दोन आरोपींना कल्याण कोळसेवाडी पोलिसांनी बेड्या ठोकल्या आहेत. अजय ठठेरा आणि भावेश भगतानी अशी अटक (Arrest) करण्यात आलेल्या दोन आरोपींची नावे आहेत. तर तिसरा आरोपी फरार असून, पोलीस त्याचा शोध घेत आहेत. मौजमजा आणि नशेसाठी हे आरोपी चोरी करायचे. सीसीटीव्ही (CCTV) फुटेजच्या आधारे कोळसेवाडी पोलिसांनी डोंबिवली परिसरातून आरोपींच्या मुसक्या आवळल्या आहेत. अजय ठठेरा हा एसी रिपेरिंगचे काम करतो. पोलीस आरोपींची चौकशी करत आहेत.
एसी रिपेरिंगसाठी गेल्यानंतर इमारतीची रेकी करायचा
अजय हा एसी रिपेरिंगचे काम करत असल्यामुळे कामानिमित्त त्याचे घरोघरी जाणे असते. एसी रिपेरिंगसाठी जेथे जायचा त्या इमारतीची पूर्ण रेकी करायचा. इमारतीत कोणते घर बंद आहे ते हेरायचा. त्यानंतर आपला साथीदार भावेशच्या मदतीने तो त्या इमारतीत घरफोडी करत घरातील ऐवज लुटून पसार व्हायचा. कोळसेवाडी परिसरात आरोपींनी अशाच प्रकारे घरफोडी केली होती. याप्रकरणी कोळसेवाडी पोलिसात चोरीचा गुन्हा दाखल करण्यात आला होता. पोलिसांनी इमारतीतील सीसीटीव्ही फुटेज तपासले. सीसीटीव्ही फुटेजमध्ये चोरटे कैद झाले होते. या फुटेजच्या आधारे पोलिसांनी आरोपींचा शोध सुरु केला.
आरोपींकडून पाच गुन्ह्यांची उकल
आरोपींना पकडण्यासाठी अप्पर पोलीस आयुक्त दत्तात्रय शिंदे पोलीस, उपायुक्त सचिन गुंजाळ, पोलीस आयुक्त उमेश माने पाटील यांच्या मार्गदर्शनाखाली वरिष्ठ पोलीस निरीक्षक बशीर शेख, गुन्हे विभागाचे पोलीस निरीक्षक सचिन गवळी यांच्या मार्गदर्शनाखाली सहाय्यक पोलीस निरीक्षक बोचरे, पगारे यांच्यासह कर्मचाऱ्याच्या पथकाने तांत्रिक पुरावे आणि सीसीटीव्हीच्या मदतीने आरोपीचा कसून शोध घेतला. आरोपी डोंबिवलीतील आयरे गावातील राहणारा असल्याची माहिती पोलिसांना मिळाली. त्यानुसार पोलिसांनी डोंबिवलीतून आरोपी अजयला अटक केले. अजयची चौकशी केली असता त्याने मित्राच्या मदतीने घरफोड्या केल्याची कबुली दिली. त्यानुसार त्याचा साथीदार भावेशलाही अटक केले. आरोपीकडून आतापर्यंत पाच घरफोड्यांची उकल करण्यात पोलिसांना यश आले आहे. आरोपींनी आणखी घरफोड्या केल्या आहेत का याबाबत पोलीस तपास करत आहेत. (Kolsewadi police arrested two accused of burglary in Kalyan)
