Cough Syrup Death : विषारी कफ सिरप बनवणाऱ्या कंपनीच्या मालकाला अटक, आतापर्यंत 20 बालकांचा मृत्यू

सध्या देशात कफ सिरपमुळे लहान मुलांच्या झालेल्या मृत्यूच प्रकरण गाजत आहे. हा विषारी कफ सिरप ‘कोल्ड्रिफ’ बनवणारी कंपनी श्रीसन फार्माचे मालक रंगनाथन गोविंदन यांना MP SIT ने अटक केली आहे. रात्री उशिरा त्यांना अटक करण्यात आली. पोलिसांनी रंगनाथन गोविंदन यांच्यावर 20 हजार रुपयांच इनाम जाहीर केलेलं. रंगनाथन गोविंदन हे चेन्नई येथील आपलं घर आणि कांचीपुरम तमिळनाडू येथील फॅक्टरीला टाळं लावून पत्नीसोबत फरार झालेले. मिळालेल्या माहितीनुसार, विषारी कफ सिरप कोल्ड्रिफ पिऊन 20 निष्पापांचा मृत्यू झाल्यानंतर छिन्दवाडाच्या परासिया पोलीस ठाण्यात 5 ऑक्टोंबरला औषध निर्माता कंपनी श्रीसन फार्माच संचालक मंडळ, बालरोजतज्ज्ञ डॉक्टर प्रवीण सोनी आणि अन्य जबाबदार व्यक्तींविरोधात कलम 105,276 व ड्रग्स एंड कॉस्मेटिक एक्ट 1940 च्या कलम 27a अंतर्गत गुन्हा दाखल केला.

बालरोजतज्ज्ञ डॉक्टर प्रवीण सोनी यांना पोलिसांनी आधीच अटक केली होती. पण अन्य अटका झाल्या नव्हत्या. औषध निर्माता कंपनीच्या मालकाच्या अटकेसाठी छिन्दवाड़ा एसपी अजय पांडे यांनी 12 सदस्यीय SIT ची स्थापना केलेली. पोलीस सूत्रांनुसार, SIT टीम रंगनाथन यांना चेन्नईवरुन भोपाळला घेऊन जात आहे. तिथे कफ सिरप निर्माण, कच्चा मालाचा पुरवठा, वितरण नेटवर्क आणि लायसन्सशी संबंधित अनियमितता याची चौकशी केली जाईल. सिरपमध्ये घातक केमिकलचा कसा समावेश करण्यात आला? कंपनीच्या क्वालिटी तपास प्रक्रियेत इतकी गंभीर चूक कशी झाली? याचा शोध घेण्यात येईल.

या घटनेने मोठी खळबळ

कोल्ड्रिफ नावाच्या या कफ सिरपच्या सेवनाने मध्य प्रदेशात 20 बालकांचा मृत्यू झाला. संपूर्ण राज्यात या घटनेने मोठी खळबळ उडाली. आरोग्य विभागाने तात्काळ विक्रीवर बंदी घातली. संबंधित कंपनी विरोधात एफआयआर नोंदवून तपास सुरु केला. या घटनेने औषधांच्या सुरक्षेच्या निकषांवर गंभीर प्रश्नचिन्ह निर्माण झालं आहे.

चेन्नई येथील अपार्टमेंटमधून ताब्यात घेतलं

अटक टाळण्यासाठी रंगनाथन मागच्या अनेक दिवसांपासून फरार होते. पोलिसांनी त्यांच्यावर इनाम जाहीर करुन तामिळनाडू आणि आंध्र प्रदेशात अनेक आठवड्यांपासून शोधमोहिम सुरु होती. याच प्रकरणात स्थापन झालेल्या SIT ने इलेक्ट्रॉनिक सर्विलांस आणि स्थानिक सुत्रांच्या मदतीने आरोपींचा शोध लावला. त्यांना चेन्नई येथील अपार्टमेंटमधून ताब्यात घेतलं.