Pune crime : 31 लाखांचं मेफेड्रॉन जप्त; अमली पदार्थ विरोधी पथकाची पुण्यातल्या कोंढव्यात कारवाई; गुवाहाटीतल्या तरुणाला केली अटक

पुणे : पुण्यातील कोंढवा परिसरात 21 लाखांचे अमली पदार्थ (Drugs) जप्त करण्यात आले आहेत. अमली पदार्थ विरोधी पथकाने ही कारवाई केली आहे. कोंढवा परिसरातील शिवरे नगरमध्ये काल सायंकाळी छापा टाकत ही कारवाई करण्यात आली. यात अमली पदार्थ विरोधी पथकाकडून 171 ग्रॅम मेफेड्रोन जप्त (Mephedrone seized) करण्यात आले आहे. या कारवाईत पोलिसांकडून आसामच्या एका 24 वर्षीय आरोपीला अटक करण्यात आली आहे. राहुल हितेश्वर नाथ असे अटक करण्यात आलेल्या आरोपीचे नाव असून तो मूळचा गुवाहाटी येथील रहिवासी आहे. पुणे शहरात मोठ्या प्रमाणात अंमली पदार्थ विक्री करणाऱ्या तस्कारांचे प्रमाण वाढले आहे. कोट्यवधी रुपयांच्या अंमली पदार्थांची विक्री या तस्करांकडून (Smugglers) होत असल्याचे पोलिसांच्या कारवाईतून पुढे आले आहे. अशीच एक कारवाई काल (रविवारी) अमली पदार्थ विरोधी पथकाने केली आहे.

गस्त घातल असताना कारवाई

राहुल हितेश्वर नाथ (वय 24, रा. शिवनेरीनगर, कोंढवा, मूळ रा. गुवाहाटी, आसाम) असे अटक करण्यात आलेल्या आरोपीचे नाव आहे. कोंढवा भागात अमली पदार्थ विरोधी पथक गस्त घालत होते. त्यावेळी शिवनेरीनगर परिसरात एकजण मेफेड्रोनची (एमडी) विक्री करत असल्याची माहिती पोलीस कर्मचारी अझीम शेख यांना मिळाली होती. त्यानंतर सापळा लावून पोलिसांच्या पथकाने आरोपीला पकडले. राहुल नाथ याच्याकडून एक दुचाकी, 31 हजार 500 रुपये, मोबाइल संच तसेच 20 लाख 52 हजारांचे मेफेड्रोन जप्त करण्यात आले.

20 लाख 52 हजारांचे मेफेड्रोन जप्त

हे मेफेड्रोन नाथने कोठून आणले, कोणाला विकले, याचा तपास आता पोलिसांकडून सुरू करण्यात आला आहे. ही कारवाई अतिरिक्त आयुक्त रामनाथ पोकळे, उपायुक्त श्रीनिवास घाडगे यांच्या मार्गदर्शनाखाली वरिष्ठ पोलीस निरीक्षक प्रकाश खांडेकर, उपनिरीक्षक दिगंबर चव्हाण, नितीन जगदाळे, युवराज कांबळे, दिशा खेवलकर आदींनी केली. दरम्यान, मागील काही दिवसांपासून मेफेड्रॉनसह गांजा आणि इतर अमली पदार्थ छुप्या पद्धतीने तस्कर विक्री करत असल्याचे आढळले आहे. पोलिसांना खबर मिळताच अशा तस्करांच्या मुसक्या आवळण्याची कारवाई करण्यात येत आहे.