व्यावसायिक नुकसानीमुळे दररोज वाद होत होते, मुलं आईला धीर द्यायची, मग संतापलेल्या पित्याने…

दिल्ली : व्यवसायातील नुकसानीमुळे पत्नी दररोज भांडण करायची आणि मुलंही तिला साथ द्यायची. यामुळे संतापलेल्या प्रॉपर्टी डिलरने पत्नी आणि दोन मुलांवर प्राणघातक हल्ला केल्याची धक्कादायक घटना दिल्लीत घडली आहे. दिल्लीतील नेब सराई भागात ही घटना घडली. या हल्ल्यात पत्नीचा जागीच मृत्यू झाला, तर दोन्ही मुलं गंभीर जखमी झाली असून, त्यांच्यावर रुग्णालयात उपचार सुरु आहेत. याप्रकरणी आरोपीला नेब सराई पोलिसांनी अटक केली आहे. विजयवीर असे आरोपीचे नाव आहे. सुमन असे मयत पत्नीचे, शंशाक मुलाचे आणि देविका मुलीचे नाव आहे.

पती दररोज पत्नीशी भांडण करायचा

विजय हा प्रॉपर्टी डिलर आहे. त्याला त्याच्या व्यवसायात मोठे नुकसान झाले होते. यामुळे घरात दररोज भांडण होत होते. तसेच विजय पत्नीला अनेकदा मारहाणही करायचा. यावेळी मुलं आईला धीर द्यायची. यामुळे विजयने पत्नी आणि मुलांच्या हत्येचा कट रचला. त्यानुसार त्याने गुरुवारी सकाळी झोपेत असलेल्या पत्नीवर हल्ला केला. यात पत्नी सुमनचा जागीच मृत्यू झाला. त्यानंतर तो मुलांच्या खोलीत गेला आणि त्यांच्यावर वार करुन लागला. पण मुलांना जाग आणि त्यांनी त्याच्या हातातून शस्त्र हिसकावून घेतले.

यानंतर मुलीने पोलिसांना फोन करुन घटनेची माहिती दिली. पोलिसांनी तात्काळ घटनास्थळी धाव घेत दोन्ही मुलांची सुटका करत रुग्णालयात दाखल केले. पोलिसांनी घटनास्थळाहून आरोपीला अटक केली आहे. पोलीस पुढील कारवाई करत आहेत.

याआधीही केला कुटुंबीयांवर हल्ला

विजयवीरने याआधी 2017 मध्ये कुटुंबीयांवर हल्ला केला होता. पतीचे दुसऱ्या महिलेशी प्रेमसंबंध असल्याचा संशय पत्नीला होता. यातून दोघांमध्ये भांडण झाले आणि या भांडणातून त्याने पत्नी आणि मुलांवर गोळीबार केला होता. यावेळी मुलाला गोळी लागली होती. तर पत्नी आणि मुलगी बचावल्या होत्या.