Mumbai Murder : जेवण चांगले केले नाही म्हणून भांडण, हॉटेल रेसिडेन्सीमध्ये कुकने केली वेटरची हत्या

मुंबई : जेवण चांगले बनवले नाही म्हणून झालेल्या वादातून कुक (Cook)ने रागाच्या भरात वेटर (Waiter)ची चाकू भोसकून हत्या (Murder) केल्याची घटना गुरुवारी रात्री 8 च्या सुमारास मुंबईतील हॉटेल रेसिडेन्सीमध्ये घडली आहे. क्षुल्लक वादातून झालेल्या हत्येमुळे परिसरात खळबळ उडाली आहे. जगदीश जलाल असे हत्या करण्यात आलेल्या वेटरचे नाव असून माधव मंडल असे हत्या करणाऱ्या कुकचे नाव आहे. याप्रकरणी एमआयडीसी पोलीस ठाण्यात हत्येचा गुन्हा नोंदवण्यात आला आहे. पोलिसांनी आरोपी माधव मंडल याला अटक केली आहे. याबाबत पोलीस पुढील कारवाई करत आहेत.

चाकूने छातीत आणि पाठीवर वार केल्याने वेटरचा जागीच मृत्यू

अंधेरी पूर्वेत सुरण रोडवरील हॉटेल रेसिडेन्सीमध्ये काल संध्याकाळी वेटर जगदीश जलाल याने कुक माधव मंडल याला जेवण बनवायची ऑर्डर दिली होती. मात्र कुक माधव मंडल याने जेवण खराब बनवल्यामुळे वेटर जगदीश जलाल याच्यासोबत बाचाबाची झाली. याचाच राग मनात धरून माधव मंडल याने किचनमध्ये असलेल्या भाजी कापायच्या चाकूने जगदीशच्या छातीत आणि पाठीवर वार केले. या हल्ल्यात जगदीशचा जागीच मृत्यू झाला. कुक माधव मंडल याने हत्या केल्यानंतर याची माहिती मुंबई पोलिसांच्या कंट्रोल रूमला देण्यात आली. घटनेची माहिती मिळताच एमआयडीसी पोलिसांनी तात्काळ घटनास्थळी धाव घेत पंचनामा केला. एमआयडीसी पोलिसांनी हत्येचा गुन्हा नोंद करून आरोपी माधव मंडल याला अटक केली आहे. या संदर्भात अधिक तपास एमआयडीसी पोलीस करत आहेत. (A cook killed a waiter due to a dispute over food at a hotel residency in Andheri)