Mumbai Crime : लग्नाचे आमिष दाखवत महिलेवर अत्याचार, लाखो रुपयेही उकळले !
आधी मैत्री केला, मग प्रेमाच्या जाळ्यात ओढले. लग्नाचे आमिष दाखवून दोन वर्ष नको ते केले. पीडितेने पोलिसात धाव घेत तक्रार दाखल केली आहे.
मुंबई / 3 ऑगस्ट 2023 : लग्नाचे आमिष दाखवत एका 31 वर्षीय महिलेवर अत्याचार केल्याची धक्कादायक घटना मुलुंडमध्ये उघडकीस आली आहे. तसेच 15.75 लाख रुपयेही आरोपीने महिलेकडून उकळले. याप्रकरणी महिलेने मुलुंड पोलीस ठाण्यात तक्रार दाखल केली. मुलंड पोलिसांनी महिलेच्या फिर्यादीवरुन गुन्हा दाखल केला आहे. मात्र आरोपी फरार झाला आहे. आरोपीचा शोध घेण्यासाठी पोलिसांनी पथक तयार केले असून, विविध ठिकाणी छापेमारी सुरु आहे. गौरव जनार्दन धेंडे असे आरोपीचे नाव असून, त्याच्यावर बलात्कार आणि फसवणुकीचे गुन्हे दाखल करण्यात आले आहेत.
लग्नाचे आमिष दाखवत दोन वर्षे अत्याचार
पीडिता अंधेरी रहिवासी आहे. मुलुंड येथे राहणाऱ्या गौरव धेंडे याच्याशी तिची 2021 मध्ये ओळख झाली होती. ओळखीनंतर दोन महिन्यांनीच गौरवने पीडितेला लग्नाची मागणी घातली. यानंतर लग्नाचे आमिष दाखवत तिच्याकडे शारीरिक संबंधाची मागणी केली. दोन वर्ष लग्नाचे आमिष दाखवत तो तिच्याशी शारीरिक संबंध प्रस्थापित करत होता. यादरम्यान, त्याने तिच्याकडून पैशांची गरज असल्याचे सांगत 15.75 लाख रुपये उकळले.
पोलिसांकडून फरार आरोपीचा शोध सुरु
आरोपी दोन वर्ष झाली तरी लग्न करण्याचे नावच घेत नव्हता. सतत टाळाटाळ करत होता. तसेच घेतलेले पैसेही परत करत नव्हता. यामुळे आपली फसवणूक झाल्याचे पीडितेच्या लक्षात आले. यानंतर तिने मुलुंड पोलीस ठाण्यात धाव घेत पोलिसांकडे तक्रार दाखल केली. पोलिसांनी धेंडे विरोधात गुन्हा दाखल करत त्याचा शोध सुरु केला आहे.
