12 वर्षीय आरोपी मुलाच्या वडिलांचा 7 वर्षीय पीडितेच्या पालकांवर हल्ला! कारण काय?

मुंबई : 12 वर्षांच्या मुलाने 7 वर्षांच्या मुलीचं लैंगिक शोषण केल्याचा गंभीर आरोप करण्यात आला आहे. यामुळे एकच खळबळ उडाली होती. दरम्यान, या प्रकरणी पोलीस स्थानकात (Mumbai Crime News Today) तक्रारही देण्यात आलीय. महत्त्वाचं म्हणजे आरोपी मुलाच्या (Dad of Minor Accused) पित्याने पीडित मुलीच्या आईवडिलांवरच हल्ला केल्याचं समोर आलंय. सोमवारी ही धक्कादायक घटना घडली. याप्रकरणी विक्रोळी पोलीस स्थानकात (Vikroli Police Station) दोन गुन्हे दाखल करण्यात आले आहेत. आरोपी मुलासह त्याच्या वडिलांवरही पोलिसांनी गुन्हा नोंदवून घेतला आहे. याप्रकरणी आता पुढील कारवाई केली जातेय.

विक्रोळीच्या चाळीत राहून एक कुटुंबीय रोजंदारीवर काम करुन आपला संसार चालवतं. या कुटुंबातील आईवडील जेव्हा घरी आले, तेव्हा त्यांच्या 7 वर्षांच्या मुलीने आपल्यासोबत घडलेला प्रसंग पालकांना सांगितला.

आपलं लैंगिक शोषण झाल्याचा आरोप पीडित 7 वर्षीय मुलीने केला. एका 12 वर्षांच्या मुलाने आपल्यासोबत हे कृत्य केल्याचं तिने आपल्या आईवडिलांना सांगितलं.  संपातलेल्या आईवडिलांनी चाळीतच राहणाऱ्या अल्पवयीन मुलाचं घर गाठलं आणि त्याला जाब विचारला.

यावेळी आरोपी मुलाचे कुटुंबीय आणि मुलीचे कुटुंबीय यांच्या बाचाबाची झाली. बाचाबाचीचं रुपांतर नंतर हाणामारीत झालं. आरोप करण्यात आलेल्या मुलाच्या वडिलांना पीडितेच्या पालकांवर हल्ला केला. यावेळी इतर शेजारी मध्ये पडले आणि त्यानंतर हे प्रकरण थेट पोलीस स्थानकात पोहोचलं.

विक्रोळी पोलिसांनी दिलेल्या माहितीनुसार, या प्रकरणी पॉक्सो कायद्याअंतर्गत गुन्हा दाखल करण्यात आला आहे. पण आरोपी अल्पवयीन असल्याने त्याला अटक करण्यात आलेली नाही. पण या मुलाच्या वडिलांना मारहाणप्रकरणी अटक करण्यात आली आहे. पुढील चौकशी केली जाते आहे.

विक्रोळी पोलीस स्थानकाच्या शुभदा चव्हाण यांनी दिलेल्या माहितीनुसार, मुख्य संशयित आरोपी असलेल्या मुलाचीही चौकशी केली जाईल. त्यासोबत मुलीचाही जबाब नोंदवून घेत योग्य तो तपास करुन पुढील कारवाई केली जाईल.