Mumbai news : कामावरुन आला अन् गच्चीवर गेला, कुणाला काही कळायच्या आत तरुणाने…

मुंबई : मुलीनेच आईची हत्या केल्याची घटना अजून ताजी असतानाच लालबागमध्ये पुन्हा एकदा धक्कादायक घटना घडली आहे. एका 24 वर्षीय तरुणाने 13 मजली इमारतीच्या गच्चीवरुन उडी घेतल्याची घटना उघडकीस आली आहे. सदर तरुण डिप्रेशनमध्ये होता. त्याच्यावर उपचारही सुरु होते. ध्रुव शाह असे मयत तरुणाचे नाव आहे. याप्रकरणी काळाचौकी पोलीस ठाण्यात नोंद करण्यात आली असून, पोलीस अधिक तपास करत आहेत. तरुणाचा मृतदेह केईएम रुग्णालयात शवविच्छेदनासाठी ठेवण्यात आला आहे. पोलिसांनी तरुणाचा मोबाईल आणि लॅपटॉप तांत्रिक तपासासाठी जप्त केला असल्याचे काळाचौकी पोलीस ठाण्याचे वरिष्ठ निरीक्षक प्रमोद भोवटे यांनी सांगितले.

कामावरुन आला, गच्चीवर गेला अन्…

लालबागमध्ये 13 मजली हायप्रोफाईल इमारतीत राहणारा ध्रुव सोमवारी सायंकाळी नेहमीप्रमाणे 5.15 वाजण्याच्या सुमारास कामावरुन घरी आला. त्यानंतर तो थेट इमारतीच्या गच्चीवर गेला. त्यावेळी गच्चीवर वॉटरप्रूफिंगचे काम सुरु होते. तेथे काम करत असलेल्या कामगारांच्या काही लक्षात येण्याआधीच ध्रुवने गच्चीवर उडी घेतली.

तरुणाला तात्काळ केईएम रुग्णालयात नेण्यात आले, मात्र डॉक्टरांनी त्याला मृत घोषित केले. तरुण नैराश्येत होता. त्याबाबत त्याच्यावर उपचारही सुरु होते. तरुणाला नेमकं कोणत्या कारणातून नैराश्य आलं होतं हे अद्याप कळू शकले नाही. पोलीस या प्रकरणाचा सखोल तपास करत आहेत. तपासाअंती सर्व समोर येईल.