अंमली पदार्थ विरोधी पथकाचे अधिकारी असल्याचे सांगत तरुणाला लुटले, आरोपीची पोलीस कोठडीत रवानगी

मुंबई : अंमली पदार्थ विरोधी पथकाचे अधिकारी असल्याचे भासवत तरुणाकडून 5.30 लाख रुपये उकळल्याची घटना अंधेरी परिसरात उघडकीस आली आहे. याप्रकरणी मुंबई गुन्हे शाखेने सहा आरोपींवर गुन्हा दाखल केला आहे. एका आरोपीला अटक केली आहे. अटक आरोपीला न्यायालयात हजर केले असता, न्यायालयाने त्यांना 15 जुलैपर्यंत पोलीस कोठडी सुनावली आहे. दीपक विलास जाधव असे अटक आरोपीचे नाव आहे. तर यश चावला असे पीडित तरुणाचे नाव आहे. पोलीस याप्रकरणी सखोल तपास करत आहेत.

काय आहे प्रकरण?

पोलिसांनी दिलेल्या माहितीनुसार, यश चावला याचे वर्सोवा येथे स्टेशनरी शॉप आहे. आरोपी वर्सोवा येथे रेस्टॉरंट अँड बारमध्ये गेले होते. यावेळी चौघांनी आपण पोलीस असल्याचे सांगत यशला जवळ बोलावले. मग यशला रिक्षात बसवून रात्रभर शहरात फिरले. यादरम्यान त्याला आपण अंमली पदार्थ विरोधी पथकाचे अधिकारी असल्याचे सांगत ड्रग्ज केसमध्ये अडकवण्याची धमकी दिली.

यानंतर तरुणाकडून गूगल पे, एनईएफटीद्वारे 5.30 लाख रुपये लुटले. तसेच 7 लाख रुपयांचा चेक घेतला. मात्र तो चेक बाऊन्स झाला. आरोपींमध्ये रिक्षा चालकाचाही समावेश आहे. अटक आरोपी हा आपण इंजिनिअर असल्याची बतावणी करत होता. आरोपी दिपक जाधववर अनेक केसेस दाखल आहेत. जाधव हा मूळचा वाशिमचा असून, सध्या गोरेगाव येथे राहतो. आरोपींना आणखी कुणाची अशा प्रकारे फसवणूक केली असल्यास त्यांनी समोर येऊन तक्रार द्यावी, असे आवाहन पोलिसांनी केले आहे.