Nashik : कार्यकारी अभियंत्याच्या घरी घबाड? नाशिकमध्ये दिनेशकुमार बागुल यांना 28 लाखाचा लाच घेताना अटक, ACBकडून कसून तपास
Dineshkumar Bagul : रात्री उशिरापर्यंत बागुल यांच्या निवासस्थानी एसीबीचं पथक कारवाई करत होतं. गुरुवारी 28 लाख रुपयांची लाच घेताना दिनेशकुमार बागुल यांना रंथेहाथ पकडण्यात आलं होतं. त्यानंतर त्यांच्यावर अटकेची कारवाई करण्यात आलेली.
नाशिक : नाशिकमध्ये (Nashik News) गुरुवारी अँटी करप्शन विभागाने (ACB) कारवाई करत एका कार्यकारी अभियंत्याला (Executive engineer) अटक केली होती. या कार्यकारी अभियंत्याचं नाव दिनेशकुमार बागुल असं आहे. बागुल यांच्या घरी एसीबीची टीम कसून तपास करतेय. त्यांच्या घरात घबाड आढळून येण्याची दाट शक्यता वर्तवली जातेय. त्या अनुशंगाने शोध घेतला जातोय. रात्री उशिरापर्यंत बागुल यांच्या निवासस्थानी एसीबीचं पथक कारवाई करत होतं. गुरुवारी 28 लाख रुपयांची लाच घेताना दिनेशकुमार बागुल यांना रंथेहाथ पकडण्यात आलं होतं. त्यानंतर त्यांच्यावर अटकेची कारवाई करण्यात आलेली. ठेकेदाराकडून पैसे मागितल्यानंतर बनावट नोट घेताना दिनेशकुमार बागुल आढळून आले होते. दरम्यान, नाशिकमध्ये करण्यात आलेल्या या कारवाईनंतर आता दिनेशकुमार यांची शेकडो कोटी रुपयांची मालमत्ता असल्याचा संशयही व्यक्त करण्यात आला आहे. त्यानुसार अँटी करप्शनचं पथक पुढील तपास करतंय.
का घेतली लाच?
नाशिकच्या आदिवासी विकास विभागात दिनेशकुमार बागुल कार्यरत आहेत. या विभाता कार्यकारी अभियंता ही जबाबदारी असलेल्या दिनेशकुमार बागुल यांनी एका ठेकेदाराकडे 12 टक्के रक्कम लाच म्हणून मागितली होती. याबाबत ठेकेदाराने जेव्हा एसीबीकडे तक्रार केली, तेव्हा एसीबीने सापळा रचून या कार्यकारी अभियंत्याला रंथेहाथ पकडून अटक केलीय. सेंट्र किचन बिल मंजूर करण्यासाठी दिनेशकुमार यांनी ठेकेदाराकडे लाच मागितली होती. थोडी थोडकी नव्हे, तर तब्बल 28 लाख रुपयांची लाच घेतलाना त्यांना अटक करण्यात आली आहे. जवळपास 15 दिवस सापळा रचून ही कारवाई करण्यात आली. लाचलुचपत प्रतिबंधक विभागाच्या नाशिकमधील पथकाने ही कारवाई केली.
गुरुवारी बागुल यांना रंथेहाथ पकडल्यानंतर आता त्यांच्या मालमत्तांवरही कसून तपास केला जातोय. रात्री उशिरापर्यंत त्यांच्या घरी एसीबीच्या पथकाने पाहणी केली. नाशिकमध्ये करण्यात आलेली एसीबीची कारवाई सगळ्यात मोठी कारवाई मानली जातेय. राज्याचं आदिवासी विभागाचं काम हे नाशिकच्या आदिवासी विकास भवनातून चालवलं जातं. आदिवासी विभागामध्ये अशाप्रकारे जर अधिकारी लाच घेऊन काम करत असतील तर त्यांच्यावर कठोरातली कठोर कारवाई झाली पाहिजे, अशी मागणी आता केली जातेय.
