‘…ची बायको पॉर्नस्टार सारखी दिसतेय’, 140 जणांना मेल, पुण्यात काय चाललंय?

पुणे | 17 ऑगस्ट 2023 : महाराष्ट्रात महिलांचा आदर केला जातो. आपण महिलांना देवी मानतो. पण समाजातील विकृत प्रवृत्ती कमी होताना दिसत नाही. विशेष म्हणजे ही विकृती कुठेही असू शकते. मग ती रस्त्यावर, गाव-खेड्यात किंवा भल्या मोठ्या शहरात, हाय प्रोफाईल अशा सोसायटीतही असू शकते. त्यामुळे अशा प्रवृत्तींना ठेचायला हवं. कारण ही प्रवृत्ती ठेचली नाही तर वारंवार मुली आणि महिलांच्या विनयभंगाच्या किंवा अत्याचाराच्या घटना समोर येत राहतील. पुण्यात असाच एक प्रकार समोर आला आहे. विशेष म्हणजे पुण्यातील अतिशय हायप्रोफाईल अशा सोसायटीत हा प्रकार समोर आलाय. पुण्याच्या कोंढवा परिसरात हा धक्कादायक प्रकार समोर आला.

कोंढवा परिसरात एका हायप्रोफाईल सोसायटीत एका आरोपीने एक अतिशय विकृत कृत्य केलं. या आरोपीने सोसायटीत राहणाऱ्या एका महिलेच्या आडनावाचा उल्लेख करत संबंधित महिलेला पॉर्नस्टार म्हणत तिचा विनयभंग केला. विशेष म्हणजे आरोपीने “…ची बायको पॉर्नस्टार सारखी दिसतेय”, असा ई-मेल सोसायटीच्या 140 सदस्यांना केला.

नेमकं प्रकरण काय?

कोंढवा भागात असणाऱ्या सोसायटीमध्ये एका महिलेला पॅार्नस्टार म्हणून संबोधन करत विनयभंग करण्यात आला. महिलेच्या बदनामी संदर्भात सोसायटीमध्ये राहणाऱ्या सगळ्यांना ई-मेल आले. याप्रकरणी एका महिलेने कोंढवा पोलीस ठाण्यात फिर्याद दिली आहे. यावरून कोंढवा पोलिसांनी शेखर बाबूलाल धोत्रे याच्यावर गुन्हा दाखल केला आहे.

आरोपीने पीडितेला धमकावलं

पोलिसांनी दिलेल्या माहितीनुसार, फिर्यादी यांच्या सोसायटीमध्ये राहणाऱ्या आरोपी शेखर धोत्रे याने “…ची बायको पोर्न एक्ट्रेस सारखी दिसते, पॉर्न ऍक्टरेस आली नाही का चालायला?” असे अश्लील वाक्य वापरत सोसायटीमधील 140 सदस्यांना मेल पाठवला.

फिर्यादी यांनी आरोपीस या संदर्भात जाब विचारण्यास गेलं असता आरोपीने त्यांना धमकी दिली आणि जे करायचं ते कर असं धमकावलं. हा सगळा प्रकार त्या महिलेने पोलिसांना सांगितला असता पोलिसांनी धोत्रे याच्यावर गुन्हा दाखल केला आहे, अशी माहिती वरिष्ठ पोलीस निरीक्षक संतोष सोनवणे यांनी दिली.