पुणे शहरात चाललंय तरी काय? मध्यरात्री झाला थरार, पोलिसांवर केला गोळीबार

पुणे : पुणे शहरातील गुन्हेगारी कमी होत नाही. सांस्कृतिक शहर असलेल्या पुण्यातील वातावरण बदलू लागले आहे. गेल्या काही महिन्यांपासून पुणे शहर अन् परिसरात गुन्हेगारीने चांगलेच डोके वर काढले आहे. कधी कोयता गँगचा धुमाकूळ घालते. कधी सर्वसामान्यांच्या गाड्यांची तोडफोड होते. रस्त्यावर केक कापून दहशत निर्माण करण्याचा प्रयत्नही केला जातो. पुणेकर नागरिकांमध्ये भीती निर्माण करण्यासाठी गुन्हेगारांचा प्रयत्न सुरु आहे. पुणे पोलीस गुन्हेगारी मोडण्याचा प्रयत्न करत आहेत. परंतु त्यांचे हे प्रयत्न अपूर्ण पडत आहे. आता तर पोलिसांवर गोळीबार करण्याची घटना शुक्रवारी मध्यरात्री घडली.

मध्यरात्री काय झाले

पुणे पोलिसांनी गुन्हेगारांवर कारवाई करण्यासाठी कोम्बिंग ऑपेरेशन सुरु केले. पुण्यातील वारजे माळवाडी भागात पोलिसांचे ऑपरेशन सुरु होते. रात्री एक वाजता क्राइम बँच युनिट ३ चे पोलीस कर्मचारी कोबिंग ऑपरेशन करत होते. यावेळी म्हाडा वसाहतीत तपासणी सुरु होती. यावेळी रोजरी शाळेजवळ आठ ते दहा जणांच्या हालचाली पोलिसांना संशयास्पद दिसल्या.

मग पुढे काय झाले

पुढे जे काही झाले ते भीती निर्माण करणारे होते. पोलिसांनी आरोपींच्या दिशेने वाटचाल सुरु केली. त्यावेळी एका आरोपीने पोलिसांवर बंदूक रोखली. त्यानंतर पोलिसांवर गोळीबार केला. पोलिसांनी आरोपींवर गोळीबार सुरु केला. यावेळी धारधार शस्त्र त्या लोकांनी पोलिसांवर फेकली. त्यात एक पोलीस अधिकारी जखमी झाला. त्यानंतर आंधाऱ्याचा फायदा घेऊन आरोपी पळण्याचा प्रयत्न करु लागले.

पोलिसांनी केला पाठलाग सुरु

पोलीस आरोपींचा पाठलाग करु लागले. अखेर पाच जणांना पकडण्यात पोलिसांना यश आले. इतर पाच आरोपी अंधाराचा फायदा घेऊन टेकडीच्या दिशेने पळून गेले. अटक केलेल्या आरोपींकडून जिवंत काडतूस, चाकू अन् इतर शस्त्र जप्त केले आहे. हे आरोपी एटीएम लुटल्याच्या तयारीत होते. वारजे पोलिस ठाण्याच्या हद्दीत असलेल्या एसबीआय बँकेच्या एटीएम जवळ हा प्रकार घडला.