सरपंचपदी विराजमान होण्याआधीच काळाचा घाला, भीषण अपघातात ग्रामपंचायत सदस्याचा मृत्यू

शिरूर / पुणे, सुनील थिगळे (प्रतिनिधी) : भरधाव टेम्पोने बाईकला धडक दिल्याने बाईकवरील खडकवाडी ग्रामपंचायत सदस्यासह तिघांचा जागीच मृत्यू झाल्याची दुर्दैवी घटना उघडकीस आली आहे. पुणे जिल्ह्यातील शिक्रापूर जवळील धामारी येथे बेल्हे जेजुरी महामार्गावर हा भीषण अपघात झाला. या अपघातात माय लेकांसह एका युवकाचा जागीच मृत्यू झाला. संकेत डोके, विजया डोके आणि ओंकार सुक्रे अशी अपघातात मृत्यू झालेल्या तिघांची नावे आहेत. विजया डोके या खडकवाडी ग्रामपंचायतीच्या सदस्या होत्या आणि लवकरच सरपंचपदी विराजमान होणार होत्या. या दुर्दैवी घटनेने खडकवाडी परिसरात शोककळा पसरली आहे.

सरपंचपदी विराजमान होण्याआधीच काळाचा घाला

खडकवाडी ग्रामपंचायतीचे सरपंचपद महिलांसाठी राखीव असल्याने विजया डोके यांना सरपंचपदाची संधी मिळणार होती. मात्र सरपंचपदी विराजमान होण्याआधीच काळाने त्यांच्यावर घाला घातला आणि त्यांचा मृत्यू झाला.

पुजेच्या कार्यक्रमाला जात असताना अपघात

पुजेच्या कार्यक्रमासाठी तिघे जण एकाच बाईकवरु चालले होते. यावेळी बेल्हे – जेजुरी मार्गावर धामारी परिसरात भरधाव टेम्पोने त्यांच्या बाईकला धडक दिली. या अपघातात विजया डोके यांच्यासह त्यांचा मुलगा आणि त्याचा मित्र ठार झाले.

तिघांच्या अपघाती मृत्यूने कुटुंबावर दुःखाचा डोंगर

संकेत डोके आणि ओंकार सुक्रे हे दोघेही लहानपणापासून जिवलग मित्र होते. दोघांनी जगाचा निरोपही एकत्र घेतला. तिघांच्या अपघाती मृत्यूमुळे दोन्ही कुटुंबावर दुःखाचा डोंगर कोसळला आहे.

बुलढाण्यात एसटीला अपघात

मेहकरहून खामगावकडे निघालेल्या एसटी बसला अपघात झाल्याची घटना आज बुलढाण्यात घडली आहे. खामगाव मेहकर मार्गावरील पाथर्डी घाटात बस अनियंत्रित होऊन हा अपघात झाला. अपघातात बस झाडाला धडकून अडकल्याने मोठा अनर्थ टळला. अपघातात 11 प्रवासी जखमी झाले. जखमींना मेहकर रुग्णालय हलविण्यात आलं आहे.