सात दिवसांवर लग्न, अपघातस्थळी बचावासाठी नवरदेव धावला, तिथेच भरधाव ट्रेलरने चिरडून अंत
अपघातानंतर टँकर चालक केबिनमध्ये अडकला होता. लोक त्याला बाहेर काढण्याचा प्रयत्न करत होते. त्याच वेळी अहमदाबादकडून भरधाव वेगात येणाऱ्या ट्रेलरने विनोदला चिरडले. यामुळे त्याचा जागीच मृत्यू झाला.
उदयपूर : राजस्थानमध्ये उदयपूर जिल्ह्यातील (Udaipur Accident) टीडी पोलीस स्टेशन हद्दीतील उदयपूर-अहमदाबाद राष्ट्रीय महामार्ग क्रमांक 48 वर दुर्दैवी रस्ता अपघातात एका नवरदेवाचा मृत्यू (Groom Death) झाला. अपघातात बळी पडलेल्या तरुणाचे अवघ्या सात दिवसांनी लग्न होते. अपघाताच्या वृत्ताने लग्नघरात एकच खळबळ उडाली असून संपूर्ण गाव दु:खात बुडाले आहे. अपघातानंतर संतप्त ग्रामस्थांनी मृतदेह महामार्गावर ठेवून निदर्शने (Rajasthan Crime News) केली. नंतर त्यांची समजूत घातल्यानंतर पोलिसांनी त्यांना तिथून हटवले. टीडीमधील बोरिकुआन येथे हा अपघात झाला.
अपघातस्थळी नवरदेव धावला
पोलिसांनी दिलेल्या माहितीनुसार, बोरिकुआन-गोज्या गावातील रहिवासी विनोद मेघवाल याचे 25 मे रोजी लग्न होणार होते. घरात लग्नाच्या गाण्यांचा कार्यक्रम चालू होता. बुधवारी सायंकाळी सात वाजताच्या सुमारास विनोदही डीजेवर नाचत होता. यादरम्यान घरापासून काही अंतरावर गॅसचा टँकर उलटला. टँकर उलटल्याची माहिती मिळताच विनोदही मित्र आणि नातेवाईकांसह तिथे पोहोचला.
भरधाव ट्रेलरखाली चिरडून मृत्यू
अपघातानंतर टँकर चालक केबिनमध्ये अडकला होता. लोक त्याला बाहेर काढण्याचा प्रयत्न करत होते. त्याच वेळी अहमदाबादकडून भरधाव वेगात येणाऱ्या ट्रेलरने विनोदला चिरडले. यामुळे त्याचा जागीच मृत्यू झाला. विनोदच्या मृत्यूवर कोणाचाही विश्वास बसत नव्हता. त्याच्या कुटुंबीयांना माहिती मिळताच गावात शोककळा पसरली.
नातेवाईकांचा ठिय्या
अपघातानंतर विनोदचे नातेवाईक व ग्रामस्थ संतापले. त्यांनी मृतदेह महामार्गावर ठेवून आंदोलन छेडले. माहिती मिळताच टीडी पोलीस ठाण्याचे पथक घटनास्थळी पोहोचले व त्यांनी लोकांना समजावण्याचा प्रयत्न केला, मात्र संतप्त झालेले लोक शांत झाले नाहीत. नंतर पोलिसांनी मोठ्या प्रयत्नाने ग्रामस्थांना शांत केले. पोलिसांनी तिथून मृतदेह उचलून टीडी येथील सामुदायिक आरोग्य केंद्रात नेऊन शवविच्छेदन केले.
एकुलता एक मुलगा गेला
25 मे रोजी ऋषभदेव थापडावाडी येथील रहिवासी मनीषा हिच्याशी विनोदचा विवाह होणार होता. दोन्ही कुटुंबातील आनंदाचे वातावरण अपघातानंतर काही मिनिटांत शोकात रूपांतरित झाले. विनोद हा उदयपूरमधील एका खासगी महाविद्यालयाचा विद्यार्थी होता. तो त्याच्या आई-वडिलांचा एकुलता एक मुलगा होता. त्याला दोन बहिणी आहेत. त्यापैकी एक विवाहित आहे. विनोदचे वडील मजूर आहेत
