नवऱ्याच्या हत्येचा प्लानिंग कधीपासून होता? पल्लवी Google वर काय सर्च करत होती? धक्क्यामागून धक्के

कर्नाटकचे माजी डीजीपी ओम प्रकाश यांच्या हत्येबाबतचा नवा खुलासा समोर आला आहे. ओम प्रकाश यांची पत्नी पल्लवी मर्डरची आधीपासूनच प्लानिंग करत होती. हत्याकांडाची पद्धत ती शिकत होती. त्यासाठी तिने गुगलचा आधार घेतला होता, अशी धक्कादायक माहिती पोलीस सूत्रांनी दिली आहे. एका माजी पोलीस अधिकाऱ्याला मारण्यासाठी त्याच्या पत्नीने अत्यंत शातिर पद्धतीने षडयंत्र रचल्याचं समोर आल्याने खळबळ उडाली आहे.

पोलीस सूत्रांनी दिलेल्या माहितीनुसार, पोलिसांनी पल्लवीची गुगल हिस्ट्रीच शोधून काढली आहे. एखाद्या व्यक्तीच्या मानेजवळच्या नसांवर वार केल्यावर तो मरतो का? अशी माहिती तिने सर्च केली होती. पोलिस सूत्रांनुसार, रविवारी रात्री बेंगळुरूतील आपल्या घरी पतीची हत्या करण्यापूर्वी पल्लवी यांनी अनेक दिवसांपासून माहिती गोळा केली होती. पोलिसांनी ६४ वर्षीय पल्लवी यांना सोमवारी अटक केली आणि त्यांच्या मुलगा कार्तिकेश यांच्या तक्रारीनंतर १४ दिवसांची न्यायिक कोठडी सुनावली. कार्तिकेश यांनी असा दावा केला की, त्यांची आई वारंवार त्यांच्या वडिलांशी भांडत असे आणि त्यांना ठार मारण्याच्या धमक्या देत असे. आता या प्रकरणाची चौकशी बेंगळुरूच्या सेंट्रल क्राइम ब्रँच (CCB) करत आहे.

वाचा: सासूशी लग्न करणाऱ्या जावयाला वडिलांनी हकलले घरा बाहेर, पत्नीने लगेच तयार केला दुसरा प्लान

पल्लवीच्या फोनमध्ये काय आढळलं?

पल्लवीच्या मोबाईल तपासणीतून पोलिसांना समजलं की त्यांनी इंटरनेटवर “मानेजवळच्या नसांवर वार करून माणसाला कसं ठार मारता येतं” यासंबंधी माहिती शोधली होती. त्यांच्या डिव्हाइसच्या सर्च हिस्ट्रीमध्ये पाच दिवसांपर्यंत याच प्रकारच्या गुगल सर्चेस आढळून आल्या. याशिवाय, पल्लवी यांच्यावर स्किझोफ्रेनिया या मानसिक आजारासाठी उपचार सुरू असल्याचंही समोर आलं. पल्लवी यांनी दावा केला आहे की, त्यांना त्यांच्या पती — जे माजी वरिष्ठ पोलीस अधिकारी होते — यांच्या हातून घरगुती हिंसाचार सहन करावा लागत होता. सोमवारी रात्री न्यायालयातून तुरुंगात नेत असताना त्यांनी माध्यमांच्या प्रश्नांना उत्तर देताना वारंवार “घरगुती हिंसाचार” असं म्हणत हेच कारण असल्याचं सांगितलं.

“मी राक्षसाला ठार मारलं”: हत्या कशी झाली?

६८ वर्षीय प्रकाश हे १९८१ च्या बॅचचे आयपीएस अधिकारी होते आणि मूळचे बिहारचे होते. त्यांचा मृतदेह त्यांच्या तीन मजली घराच्या तळमजल्यावर रक्ताच्या थारोळ्यात आढळून आला. प्राथमिक तपासानुसार, एका कौटुंबिक वादामुळे वादळं झालं आणि पल्लवी यांनी कथितपणे प्रकाश यांच्या चेहऱ्यावर मिरची पूड फेकली. वेदनांनी व्याकूळ होत असताना, पल्लवी यांनी त्यांच्यावर अनेक वेळा चाकूने वार केला, ज्यामुळे त्यांचा मृत्यू झाला. या घटनेनंतर, पल्लवी यांनी एका मैत्रिणीला व्हिडिओ कॉल केला आणि सांगितलं, “मी राक्षसाला ठार मारलं.”

मुलगा कार्तिकेशचा आरोप काय होता?

कार्तिकेश यांनी सांगितलं की, गेल्या आठवड्यापासून त्यांची आई त्यांचे वडील प्रकाश यांना ठार मारण्याच्या धमक्या देत होती. त्यामुळे प्रकाश काही दिवस त्यांच्या बहिणीच्या घरी राहायला गेले होते. घटनेच्या दोन दिवस आधी त्यांची धाकटी बहीण कृति वडिलांना भेटायला गेली आणि त्यांना घरी परत यायला मनवलं, जरी ते अनिच्छुक होते. रविवारी सायंकाळी पाचच्या सुमारास जेव्हा कार्तिकेश कर्नाटका गोल्फ असोसिएशनमध्ये होते, तेव्हा एका शेजाऱ्याने त्यांना फोन करून सांगितलं की, त्यांचे वडील ग्राउंड फ्लोरवर बेशुद्धावस्थेत पडले आहेत. त्यांनी पोलिसांना सांगितलं की, पल्लवी आणि कृति दोघींचंही वडिलांशी वारंवार भांडण होत असे आणि त्यांना दोघींवरही हत्या करण्यात हात असल्याचा संशय आहे. त्यांनी पोलिसांकडे कायदेशीर कारवाई करण्याची मागणी केली आहे. हेही समोर आलं आहे की काही महिन्यांपूर्वी पल्लवी HSR लेआउट पोलीस ठाण्यात तक्रार दाखल करण्यासाठी गेल्या होत्या, पण जेव्हा पोलिसांनी तक्रार नोंदवून घेण्यास नकार दिला, तेव्हा त्यांनी पोलीस ठाण्याच्या बाहेर धरना दिला होता.