पुण्यात कात्रज बोगद्याजवळ विचित्र अपघात, चार वाहनांचा चक्काचूर

पुणे / अभिजीत पोते : भरधाव ट्रकने टेम्पो ट्रॅव्हलला धडक दिल्याने घडलेल्या विचित्र अपघातात चार वाहनांचा चक्काचूर झाला. अपघातात सहा जण जखमी झाले आहेत. कात्रज बोगद्याजवळ दरी पूल पेट्रोल पंपापासून 100 मीटर अंतरावर हा अपघात घडला. सुदैवाने यात कोणतेही जीवितहानी झाली नाही, मात्र वाहनांचे मोठ्या प्रमाणात नुकसान झाले. अपघातात वाहने रस्त्यावर पलटी झाली. सीट बेल्ट लावल्याने प्रवासी थोडक्यात बचावले. अपघातानंतर ट्रक चालक फरार झाला. याप्रकरणी सिंहगड पोलीस ठाण्यात अपघाताची नोंद करण्यात आली आहे.

ट्रकच्या धडकेत चार वाहनांचा चक्काचूर

पुणे मुंबई महामार्गावर सकाळच्या सुमारास ही घटना घडली. दरी पूल पेट्रोल पंपाजवळ मुंबईच्या दिशेने येणाऱ्या भरधाव ट्रकने पुढे चाललेल्या टेम्पो ट्रॅव्हलला जोरदार धडक दिली. धडक इतकी जोरात होती की टेम्पो ट्रॅव्हलसह अन्य दोन वाहने या अपघातग्रस्त झाली आणि रस्स्तावर पलटली. या अपघातात चार वाहनांचा चक्काचूर झाला. या अपघातात एकूण सहा जण जखमी झाले.

अपघाताची माहिती मिळताच सिंहगड पोलिसांनी तात्काळ घटनास्थळी धाव घेत बचावकार्य सुरु केले. सिंहगड पोलिसांनी अपघाताचा गुन्हा दाखल केला आहे. सर्व जखमी सातारा, पुणे, मुंबईतील रहिवासी आहेत. जखमींना उपचारासाठी नजीकच्या रुग्णालयात नेण्यात आले.

बाळुमामाच्या भाविकांच्या वाहनाला अपघात

बाळुमामाच्या पालखी तळावर धार्मिक विधी करण्यासाठी गेलेल्या भाविकांच्या वाहनाला परतीच्या वेळी अपघात झाल्याची घटना घडली. न्हावरे-तळेगाव ढमढेरे रस्त्यावरील दहिवडी घाट येथे पिकअप जीप आणि ट्रॅक्टर यांच्यात समोरासमोर जोरात धडक झाली. ट्रॅक्टर-पीकअपची जोरात धडक होऊन यात आठ जण जखमी झाले. अपघातात वाहनांचा चक्काचूर झाला. जखमींवर शिक्रापूर येथील रुग्णालयात उपचार सुरू आहेत.