परीक्षेत कॉपी करत असल्याच्या संशयातून शिक्षकाने उतरवले कपडे, घरी जाताच विद्यार्थिनीने पेटवून घेतले

झारखंड : परीक्षेत कॉपी केल्याच्या संशयातून शिक्षकेने कपडे उतरवल्याने विद्यार्थिनीने स्वतःचे जीवन संपवण्याचा प्रयत्न (Attempt to killed herself) केल्याची घटना झारखंडमधील जमशेदपूरमध्ये घडली आहे. या घटनेत विद्यार्थिनी गंभीर भाजली (Burned) आहे. तिला उपचारासाठी एमजीएम रुग्णालयात दाखल करण्यात आले. मात्र तिची प्रकृती चिंताजनक (Critical condition) असल्याने तिला टीएमएचमध्ये रेफर करण्यात आले आहे.

पीडित मुलगी इयत्ता नववीत शिकते

जमशेदपूरमधील छायानगरमध्ये राहणारी पीडित मुलगी साकची येथील शाळेत इयत्ता नववीत शिकत होती. सध्या शाळेत परीक्षा सुरु आहे. परिक्षेवेळी पीडित मुलगी कॉपी करत असल्याचा शिक्षिकेला संशय आला.

शिक्षिकेने सर्वांसमोर कपडे उतरवले

संशयातून शिक्षिकेने मुलीला वर्गात सर्वांसमोर कपडे उतरवायला सांगितले आणि मारहाण केली. यामुळे मानसिक तणावात आलेल्या मुलीने घरी जाऊन स्वतःला पेटवून घेतले, अशी माहिती मुलीने पोलीस जबाबात दिली आहे. आपण कोणतीही कॉपी केली नसल्याचे मुलीने सांगितले.

मुलीची प्रकृती चिंताजनक

या घटनेत मुलगी 80 टक्के भाजल्याने तिची प्रकृती चिंताजनक आहे. याप्रकरणी पीडित मुलीच्या नातेवाईकांनी रुग्णालयात गोंधळ घातला आहे. संबंधित शिक्षिकेवर कारवाईची मागणी नातेवाईकांनी केली आहे. घटनेचा तपास सितारामडेरा पोलीस करत आहेत.

याबाबत शाळेशी संपर्क साधला असता, मुलगी परीक्षेत कॉपी करत होती. यामुळे शिक्षिकेने तिला दम दिला. कपडे उतरवण्याबाबत आपल्याकडे कोणतीही माहिती आली नसल्याचे शाळेच्या मुख्याधिपकांनी सांगितले.

शाळेतून आल्यानंतर मुलगी तणावात होती

मुलीच्या घरच्यांनी सांगितल्याप्रमाणे, मुलगी शुक्रवारी परीक्षेचा पेपर देऊन घरी आली तेव्हा खूप तणावात होती. त्यानंतर शाळेच्या युनिफॉर्मवरच तिने स्वतःला पेटवले. घरच्यांनी तिला रुग्णालयात दाखल केले. शाळेत कपडे उतरवल्याची माहिती मुलीच्या मैत्रिणीने दिली.